Berisha heq logon e PD, kërkon votë vetëm me Shtëpinë e lirisë

Në prezantimin e kandidatëve të koalicionit “Shtëpia e Lirisë” nuk do të përdoret logoja e Partisë Demokratike.

Ndryshimi u vu re këtë të shtunë në takimin prezantues të kandidatit Hekuran Xhani, ku Berisha bëri thirrje që të votohet vetëm logoja e koalicionit.

“Ndaj i bëj thirrje mençurisë tuaj, mos gaboni të votoni për Ferdinand Saraçin, pasi tund logon e marrë me dhunë. Logoja e fitores është ajo e Shtëpisë së Lirisë”, tha Berisha,

Burime nga Komisioni i Rithemelimit thanë për Euronews Albania se heqja e logos së PD nga takimet prezantuese të kandidatëve të “Shtëpisë së Lirisë” ka qenë një zgjedhje taktike elektorale.

Për shfaqjen e Berishës dhe kandidatëve të koalicionit “Shtëpia e lirisë” me logon e PD, gjatë një interviste për Euronews Albania, komisioneri i zgjedhjeve, Ilirjan Celibashi mbajti këtë qëndrim: “Nëse do të jetë rasti do ketë një vendimmarrje. Për këtë dhe çdo lloj kërkese që mund të vijë në KQZ nga subjektet politike”.

Fushata e zgjedhjeve të 6 marsit zyrtarisht nis më 19 shkurt, por palët politike i kanë nisur takimet elektorale prej disa javësh tashmë.

LEXONI GJITHASHTU:

• Gjekmarkaj: Berisha gjeti strehë në LSI
• Berisha kundër zgjatjes së afatit të organeve të Vetingut