Berisha komenton vizitën e Ramës në Prishtinë: Akt hipokrizie

Kryetari i Partisë Demokratike, Sali Berisha, ka reaguar në rrjete sociale pas vizitës së kryeministrit Edi Rama në Kosovë, me rastin e 18-vjetorit të Pavarësisë. Berisha e cilësoi Ramën si “armik të egër të Kosovës, të lirisë dhe të dinjitetit të qytetarëve të saj”.

Ai u shpreh se qëndrimet dhe veprimet e kryeministrit shqiptar kanë dëmtuar sovranitetin dhe udhëheqjen e Kosovës ndërsa theksoi se vizita e Ramës është e motivuar nga interesi për të paraqitur mbështetje ndaj ish-udhëheqësve politikë kosovarë.

Berisha e quajti vizitën e Ramës “një akt hipokrizie” ndërsa iu bëri thirrje gjykatësve në Hagë që të vendosin mbi bazën e ligjit dhe të shpallin pafajsinë e ish-udhëheqësve politikë të Kosovës, duke theksuar rolin e tyre në mbrojtjen e qytetarëve kosovarë gjatë periudhës së gjenocidit serb.