Berisha kundër zgjatjes së afatit të organeve të Vetingut

Ish-kryeministri Sali Berisha e quajti procesin për zgjatjen e afateve të organeve të Vetingut, një projekt gjigant korruptiv. Para Kuvendit, ai deklaroi se është kundër këtij amendamenti.

Ish-kryeministri ngriti akuza të rënda duke thënë se Vetingu është përdorur për spastrime krahinore, klasore dhe fetare.

Ai deklaroi më tej se do të merret një nismë ligjore në parlament për mbrojtjen e banesave të qytetarëve shqiptarë. Berisha nënvizoi se janë mijëra banesa të pasigurta në Shqipëri.

“Banorët në përputhje me ligjin po mbrojnë shtëpitë e tyre që barbarisht po shkatërrohen nga një bandë e veshur me pushtet. Ato po shkatërrohen nga një bandë e veshur me pushtet në kundërshtim me parimet e shtetit ligjor dhe Konventën Europiane të të Drejtave të Njeriut”, u shpreh ai teksa iu referua shembjeve të banesave në zonën e 5 Majit.

Ai sqaroi se nuk është kundër urbanizimit, por kundër marrjes së pronave të qytetarëve pa dëmshpërblimin sipas rregullave të tregut.