Berisha me krerët e degëve të Tiranës: Protesta e 7 korrikut bashkoi opozitën

Kryetari i PD, Sali Berisha ka zhvilluar sot një mbledhje me krerët e degëve të Tiranës, pak ditë pas protestës së 7 korrikut.

Ai u shpreh se protesta bashkoi opozitën dhe ishte sukses për Shqipërinë.

Sipas Berishës më 7 korrik në shesh ishte mbledhur opozita e vërtetë, ndërsa akuzoi qeverinë se po vjedh qytetarët, duke depozituara paratë në emër të të gjallëve por edhe të të vdekurve.

“Aspekti më i rëndësishëm i të gjitha aspekteve të tjera të kësaj proteste, ishte se për herë të parë prej vitesh, në shesh doli opozita e vërtetë. Dhe nëse më pyesni ju mua se çfarë ishte më e veçanta, më e rëndësishmja, më e jashtëzakonshmja, ishte opozita e vërtetë në shesh. Kjo përbën një ogur të madh të bardhë për Shqipërinë, në rrezik, për shpëtimin e saj,” – tha kryedemokrati ndërsa nënvizoi se shpëtimi vjen pikërisht nga Partia Demokratike, shoqëria civile dhe forca të tjera opozitare.

Në mbledhjen me krerët e degëve, Berisha solli në vëmendje se nëse opozita do të ishte në lartësinë e duhur, Edi Rama sot do të ishte në burg.

“Vjedhje dhe shpërdorime nga ky regjim monist. Sa do të lejojmë ne që të vidhen, të varfërohen në këtë mënyrë qytetarët shqiptarë, ne jemi përgjegjës. Nëse opozita do të kishte qenë në lartësinë e duhur, në misionin e vet, Edi Rama s’do të ishte kurrë sot në pushtet, do të ishte në burg për vjedhjen që ka bërë,” – tha Sali Berisha.

LEXONI GJITHASHTU:

• Berisha: Protesta më madhështore në 30 vjet, në shesh ishte opozita bio