Berisha për bizneset e vogla: Me PD në pushtet, garantojmë lehtësira fiskale

Kreu i Partisë Demokratike, Sali Berisha, ka premtuar lehtësira fiskale dhe sociale në 100 ditët e para të qeverisjes, nëse PD vjen në pushtet.

Në një takim me qytetarë dhe përfaqësues të biznesit të vogël, Berisha deklaroi se prioritet i parë do të jetë amnistia fiskale për të gjithë bizneset e vogla, si dhe fshirja e gjobave për qytetarët, përfshirë edhe pensionistët.

Ai theksoi gjithashtu uljen e çmimit të energjisë elektrike për biznesin e vogël nga 18 në 6 lekë për kilovat.

“Ne jemi të vendosur të mbështesim fuqishëm biznesin e vogël sepse është biznesi që punëson më shumë dhe është biznesi që pasqyrohet më shpejt dhe më mirë në mirëqenien e njerëzve.

Çfarë do bëjmë ne? Për biznesin e vogël do ulim çmimin e energjisë nga 18 në 6 lekë. E kemi pasur 6, në 6 do zbresim pak. Tavanin 140 mijë euro pa taksa do e ngremë në 180 mijë euro. Edhe kjo është një lehtësim, një frymëmarrje”, tha Berisha.

Sipas kreut të PD, ndryshimet do të pasojnë edhe me tarifa të ulëta në dogana dhe garanton amnisti fiskale për gjithë bizneset e vogla dhe jo vetëm.

“Ujin do e përgjysmojmë tarifën dhe bashkia nuk do mund, me ligj, të vendosë më shumë se 1 përqind të xhiros taksa. Sot shkon deri në 8 përqind të xhiros dhe sillen në mënyrë absurde. Plus që do ketë lehtësira në dogana, çka do e bëjë furnizimin tuaj më të lirë. Ne nuk ecim me parimin e tarifave të larta në dogana, jo, ne jemi për tarifa të ulëta…

Absolutisht, 100 ditët e para do jetë amnistia fiskale për të gjithë bizneset e vogla. Por do jetë edhe amnistia për të gjitha gjobat, jo vetëm për biznesin e vogël, për edhe qytetarët, për pensionistët. Për këtë u garantoj”, shtoi Berisha.

LEXONI GJITHASHTU:

• Kurti jep dorëheqje nga posti i Kryeministrit para betimit si deputet
• Kryemadhi paraqitet në SPAK: Meta u “rrëmbye” me urdhër të ish-ambasadores Yuri Kim