Kryetari i Partisë Demokratike, Sali Berisha, deklaroi se kryeministri Edi Rama është vasal i presidentit turk, Rexhep Tajip Erdogan, pasi sipas tij, ky i fundit ka kërkuar mbylljen e kolegjit “Mehmet Akif”.
Në një deklaratë për mediat nga selia blu, Berisha u shpreh se Erdogan e konsideron Shqipërinë si një vend ku mund të urdhërojë hapjen apo mbylljen e shkollave.
“Dua të dënoj edhe një herë, me ashpërsinë më të madhe, qëndrimin cinik, të ulët, të Edi Ramës ndaj shkollave, ndaj arsimit privat në Shqipëri. Ky vasal i shpifur i Erdoganit, i presidentit të Turqisë, i cili e konsideron Shqipërinë si një vend ku mund të urdhërojë hapje e mbyllje shkollash, ka urdhëruar mbylljen e një kolegji me parametrat më të mirë dhe një histori 26-vjeçare në Shqipëri, “Mehmet Akif”.
Edi Rama u tha shqiptarëve se shkaku i mbylljes ishte se miku i tij, me avionin e të cilit udhëton dhe e ka si taksi, ka blerë godinën. Gënjeshtar i lindur, i shpifur. Të na thotë pak, kopshti me 255 fëmijë, të gjithë të afërt me moshën e djalit të tij, çfarë kishe me kopshtin që mbylle? A mundet një kryeministër të bëjë betejë me 255 parashkollorë?”, theksoi kryedemokrati.
Rreth orës 10 të mëngjesit të së hënës u zhvillua protesta e gjimnazistëve të shkollës “Mehmet Akif”.
Me pankarta në duar dhe thirrje të emrit të shkollës njëzëri, nxënësit kanë kundërshtuar vendimin e qeverisë për mbylljen e institucionit.
Ata u mblodhën para Ministrisë së Arsimit, ndërsa thonë për mikrofonin e Euronews Albania se nuk ju kanë dhënë asnjë arsye mjaftueshëm të fortë sa për të justifikuar mbylljen e gjimnazit të tyre.
LEXONI GJITHASHTU
