Berisha: Rama i përmbyti qytetarët në pabesi, dallgë të tillë s’kishte parë Shkodra

Kryetari i Partisë Demokratike, Sali Berisha ka akuzuar kryeministrin Edi Rama për përmbytjet në Shkodër.

Në një deklaratë për mediat jashtë ambienteve të Kuvendit, Berisha u shpreh se pa njoftuar autoritetet vendore në Shkodër, u hapën portat e Komanit dhe Vaut të Dejës, duke i zënë në befasi qytetarët.

Sipas tij, Shkodra nuk është përballur më parë me këtë situatë.

“Të nderuar qytetarë, në interpelancë po flet autori i vërtetë i dramës që po përjetojnë Shkodra dhe Nënshkodra, po flet njeriu që në pabesi, në mesnatë, pa informuar asnjë njeri, pa informuar sipas ligjit, autoritetet vendore, hapi të gjitha tunelet dhe portat e Komanit dhe Vaut të Dejës dhe krijoi një dallgë përmbytëse të tillë që nuk e kishte parë Shkodra, dallgë e cila nxori nga themelet urën e vjetër të Bahçallëkut, monument kulture, dallgë që përmbyti në një kohë të shkurtër 500-600 banesa.

Ky akt i mosnjoftimit është vepër penale. Qëllimi ishte që përmbytja të mos i faturohej hapjes së digave dhe kaskadës, që me ligj bëhet përgjegjëse për dëmshpërblimin e banorëve. E dyta, të fshihte faktin se për ditë të tëra nuk prodhoi energji elektrike, duke lejuar edhe rritjen e lartësisë së ujit në Koman, që është një liqen me kapacitet realisht të kufizuar dhe mbushet dhe stërmbushet nga lumenjtë e rrëmbyer brenda një kohe të shkurtër”, theksoi kryedemokrati.

LEXONI GJITHASHTU

• ‘Je porositës i vrasjeve’, Berisha-Ballës: S’ke vend në Parlament, shko në Prokurori

• Berishës nuk i jepet fjala në Kuvend, hyn ‘live’ në Facebook

• Tensione në Kuvend, Sali Berisha bllokon foltoren