Berisha: Reforma territoriale një dështim, u bazua në dëshira partiake për punësime

Kryetari i Partisë Demokratike, Sali Berisha deklaroi se reforma territoriale është një dështim, që sipas tij, u bazua në dëshira partiake për të punësuar militantë.

Gjatë fjalës së tij në mbledhjen e Grupit Parlamentar, Berisha u shpreh se reforma nxorri në pah diskiminimin ndaj qytetarëve dhe pabarazinë e tyre ndaj shërbimeve.

“Reforma territoriale e qeverisë aktuale është një nga dështimet madhe në historinë e vendit, dështim i cili nxorri në pah diskriminimin madhor të qytetarëve shqiptarë, pabarazinë e tyre në aksesin ndaj shërbimeve. Një ndarje territoriale, e bazuar në dëshira partiake dhe në kundërshtim flagrant me kriteret e përcaktuara nga Kongresi i Autoriteteve Rajonale të Evropës, në kundërshtim të hapur me qytetarët shiqptarë.

Kjo reformë është dështim, sepse supozohej që të lehtësonte barrën e administratën për qytetarët shqiptarë. Kjo ishte reforma e punësimit partiak”, theksoi kryedemokrati.

Nëse nuk do të ketë shtyrje, Komisioni i Reformës Territoriale pritet ta përmbyllë punën e tij në 30 shtator.

LEXONI GJITHASHTU

• Balla për reformën territoriale: Do t’i qëndrojmë ndarjes aktuale
• Reforma territoriale, ekspertët: Shqetësues punësimi i militantëve në bashki