Berisha: Sot nis qëndresa e opozitës, Rama e bëri parlamentin institucion personal

Ish-kryeministri Sali Berisha ka thënë se sot do të nisë qendresa permanente e opozitës. Ai së bashku me grupin e deputetëve të rithemelimit dhe ata mbështetës të grupimit të Gazment Bardhit, kanë bllokuar punimet në seancën e sotme plenare gjë që bëri edhe anulimin e seancës për ditën e sotme.

Ermonela Felaj, nënkryetare e Kuvendit tha se seanca e planifikuar për ditën e sotme do të zhvillohet në një moment të dytë, ndërsa paralajmëroi se do të merren masa për të gjithë deputetët që bllokuan foltoren.

Berisha nga ana tjetër tha se opozita do të bëjë qëndresë pasi sipas tij parlamenti është shndërruar në një institucion personal të Edi Ramës.

“Deputetët e opozitës fillojnë sot qëndresën e tyre permanente sepse ky parlament është shndërruar në një institucion personal të Edi Ramës dhe Lindës së parlamentit, që e drejton këtë institucion në mënyrën më amorale, më të turpshme, më antikushtetuese, më antiligjore.

Unë ju rikujtoj ju se ne deputetët, që përfaqësojmë qytetarët shqiptarë që kanë votuar kundër kësaj qeverie, kemi dorëzuar në parlament gjatë këtyre dy viteve, në përputhje me mandatet tona, 31 ligje dhe rezoluta, të cilat Edi Rama me Lindën e tij, i mban në sirtar dhe nuk lejon që ato të vijnë të shqyrtohen, të diskutohen në parlament.

Së dyti, në emër tuaj, në emër të qytetarëve opozitarë, deputetët e opozitës në mënyrë të vazhdueshme kërkojnë në komisione paraqitjen e ministrave dhe ata me urdhër të Edi Ramës, refuzojnë të paraqiten duke shkelur Kushtetutën dhe ligjet e vendit.

Së treti, pas komisionit hetimor parlamentar të djegësave, në të cilën Edi Rama, ministrat e tij dhe një pjesë e madhe e nomenklaturës së krimit, dilte e implikuar, deputetëve të opozitës i është hequr e drejta e krijimit të komisioneve parlamentare.

Në kundërshtim me Kushtetutën, në kundërshtim me vendimet e Gjykatës Kushtetuese, janë kthyer gjer sot 5 nisma, 5 kërkesa për krijimin e komisioneve hetimore parlamentare.

U refuzua kërkesa e komisionit hetimor parlamentar për McGonigal, një nga veprimtaritë më të shëmtuara, më kriminale, në të cilën Edi Rama, Dorian Duçka, Charles McGonigal dhe Agron Neza kanë vepruar si një grup i strukturuar kriminal.

Ata kanë abuzuar me pushtetin e tyre dhe janë vërsulur në manipulim dosjesh dhe shpifjesh për opozitën.

Ata kanë instaluar në Shqipëri sistemin e gjobëvënies ndaj biznesmenëve të vendit, ndërkohë që McGonigal ishte në detyrë, shef i kundërzbulimit të FBI në SHBA.

McGonigal ka pranuar për dosjen shqiptare, të gjitha akuzat e ngritura nga juria e madhe dhe prokuroria e SHBA. Por në secilën prej atyre akuzave, bashkëfajtor me McGonigal është Edi Rama, Dorian Duçka, Agron Neza”,-thuhet në deklaratën e Berishës.

LEXONI GJITHASHTU:

• “Takim vëllazëror”, Edi Rama takon Ramush Haradinajn, zbardhet biseda mes tyre
• “Kërkuam përjashtimin e deputetëve opozitar”, Çuçi: Të hapen kamerat