Berisha të tërhiqet që demokratët të bashkohen, thotë Alibeaj

Enkelejd Alibeaj mendon se në mënyrë që demokratët të bashkohen, Sali Berisha duhet të tërhiqet nga pretendimi për PD-në, ashtu siç Lulzim Basha dha dorëheqjen nga posti i tij.

“Ndërprerja e gjuhës linçuese, proceset paralele nuk janë të shëndetshme, të ndërpritet kjo gjuhë dhe këto procese që të bashkohen demokratët. Por, ka një gjë që është e rëndësishme, ashtu siç njëri prej përfaqësuesve dha dorëheqjen, e njëjta gjë duhet të ndodhë me Berishën. Jo si kusht, por si një nevojë e njerëzve”, u shpreh Alibeaj për mediat, të enjten.

Enkelejd Alibeaj thotë se për të është e papranueshme që Sali Berisha të marrë pjesë në mbledhjet e Grupit Parlamentar të PD-së, “ndërkohë që nuk është pjesë e grupit parlamentar”.

Mëngjesin e të enjtes u zhvillua mbledhja e Grupit Parlamentar të PD-së, ku pati replika mes Alibeajt dhe Berishës.