Bien shitjet e lules së Krishtlindjes, luleshitësit: Ka ndikuar tërmeti

Në këtë sezon festash ndër lulet më të  preferuara është ajo e Krishtlindjes. Sipas luleshitësve në krahasim me vitin e kaluar numri i blerësve është në rënie.

“Ka pasur shitje, por jo si vitin e kaluar. Mbase në këtë gjendje ka ndikuar tërmeti i nëntorit, njerëzit u demoralizuan, nuk është se ndihen aq festivë”, – thotë Armira Byberi, luleshitëse.

Me afrimin e natës së Krishtlindjes edhe lulja simbol e kësaj feste ka marrë ngjyrën e saj të plotë, atë të kuqe. Kjo lule është cilësuar si Lulja e Krishtlindjes pikërisht sepse petalet e saj bëhen të kuqe pak para kësaj feste.

Edhe pse këtë vit numri i blerësve ka qenë më i reduktuar, sipas luleshitësve për festa ajo mbetet lulja më e kërkuar si dhuratë.

“Ka madhësi të ndryshme, edhe vijojnë e vogla që është tre, ka pesë, ka tetë, d.m.th, ka për të gjitha shtresat”, – thotë Xhuliana Lena, luleshitëse

Nën atmosferën ose jo të lules së natës së shenjtë, qytetarët tregojnë se po bëhen gati për festat e fundvitit, duke shpresuar që ngjarje si tërmeti i 26 nëntorit të mos ndodhin më.

“Lulen sot e blej, po përgatitemi edhe ne si gjithë familjet e tjera. Inshalla mos të kemi shqetësime si këto që kemi kaluar dhe uroj gjithë shqiptarët të gëzojnë”, – shprehet një qytetare.