Rritja e çmimeve të energjisë dhe inflacioni në Greqi i kanë dhënë një goditje të fortë biznesit të vogël, që më herët ka vuajtur nga presioni i pandemisë.
Pronarët e subjekteve janë detyruar të kërkojnë rrugë të tjera për të reduktuar koston.
Savas është një 60-vjeçar që zotëron një servis automjetesh, që ndodhet në afërsi të autostradës përmes të cilës hyn në veri të Athinës.
Ndërsa moti është ftohur në ditët e fundit, ai përdor perde plastike për të parandaluar që ajri i ftohtë të hyjë në dyqan.
Në të kaluarën Savas përdorte një kondicioner vertikal dhe një ngrohëse të vogël për të ngrohur ambientin, por rritja e çmimeve të energjisë e ka trembur, ndaj atij i duhet të mbrohet vetëm përmes barrierave fizike për të mbajtur jashtë të ftohtin.
“Kjo bëhet për energjinë. Ne kursejmë energji. I ftohti jashtë nuk hyn brenda, ndaj ambienti mbahet i ngrohtë. Në këto kushte nuk hapim kondicionerin”, thotë ai.
Por krahas çmimit të energjisë është rritur edhe ai i karburanteve, që ka bërë që të rriten çmimet e pjesëve të këmbimit.
“Një gomë që kushtonte 100 euro tani kushton 125. Gomat vijnë nga Gjermania dhe transferta kushton shumë. Kjo, sepse çmimi i gazit është rritur”, sipas sipërmarrësit.
Rreth 60 për qind e popullatës në Greqi janë të punësuar në biznese të vogla dhe të mesme, që më parë janë prekur ndjeshëm nga pandemia.
Sipas Autoritetit Statistikor Helen, inflacioni në Greqi u rrit në 8.9 për qind në mars, duke shënuar një rekord në 27 vitet e fundit.
LEXONI GJITHASHTU
