Blinken: NATO nuk do konflikt, por është i gatshëm për të

Sekretari amerikan i Shtetit, Antony Blinken, ka paralajmëruar të premten në Bruksel – para takimit të ministrave të Jashtëm të NATO-s se ndonëse aleanca nuk “synon konflikt” është “e gatshme” për të dhe do të mbrojë territoret e vendeve anëtare, teksa Rusia vazhdon të sulmojë Ukrainën.

Deklaratat e tij kanë ardhur pasi aleatët e NATO-s kanë thënë se janë të bashkuar kundër agresionit rus, mirëpo nuk kanë gatishmëri për të mbyllur hapësirën ajrore mbi Ukrainë.

Zyrtarët ukrainas kanë kërkuar këtë mbyllje, në mënyrë që të shmangin sulmet ajrore të Rusisë.

Gjuha diplomatike dhe sanksionet financiare të Perëndimit janë ashpërsuar teksa rritet numri i viktimave civile dhe refugjatëve nga pushtimi që ka mbushur një javë.

“Aleanca jonë është mbrojtëse. Ne nuk duam konflikt”, ka thënë Blinken.

“Mirëpo nëse konflikti vjen te ne, ne jemi të gatshëm për të dhe do të mbrojmë secilin inç të territorit të NATO-s”.

NATO: Nuk po kërkojmë luftë me Rusinë

Shefi i NATO-s Jens Stoltenberg e quajti “brutal” sulmin rus ndaj Ukrainës dhe dënoi sulmet ndaj civilëve dhe marrjen nën kontroll të termocentralit bërthamor të Zaporizhzhias.

“Ne dënojmë sulmet ndaj civilëve. Dhe gjatë natës, ne kemi parë gjithashtu raporte për një sulm kundër termocentralit bërthamor,” tha Stoltenberg në një konferencë të përbashkët shtypi me Sekretarin e Shtetit të SHBA Antony Blinken, përpara një takimi me ministrat e Jashtëm të vendeve perëndimore në Bruksel.

“Kjo thjesht tregon pamaturinë e kësaj lufte dhe rëndësinë e përfundimit të saj dhe nevojën e tërheqjes së të gjitha trupave nga Rusia dhe angazhimit në përpjekjet diplomatike,” shtoi Stoltenberg.

Ai tha se teksa aleatët e NATO-s kanë “zbatuar sanksione të paprecedentë” ndaj Rusisë dhe kanë ofruar mbështetje për Ukrainën, “NATO nuk është pjesë e konfliktit”.

“Ne nuk kërkojmë luftë me Rusinë”, tha Sekretari i përgjithshëm i NATO-s, Stoltenberg.

“Në të njëjtën kohë, ne duhet të sigurohemi që të mos ketë keqkuptim në lidhje me angazhimin tonë për të mbrojtur dhe mbrojtur të gjithë aleatët”, ka thënë ai.

LEXONI GJITHASHTU: 

• Përditësime LIVE 4 mars: Rusia merr kontrollin e centralit bërthamor