Boris Xhonson vizitë surprizë në Kiev, takon Zelenskin

Kryeministri i Mbretërisë së Bashkuar, Boris Xhonson është takuar të shtunën me presidentin e Ukrainës, Volodimir Zelenski në Kiev.

Ambasada britanike në Kiev ka shpërndarë një fotografi nga biseda mes dy liderëve. Udhëtimi i Xhonson ka ardhur në mënyrë surprizë pasi nuk kishte asnjë njoftim publik.

Kryeministri britanik udhëtoi për në Ukrainë për të takuar Zelenskin personalisht ‘në shenjë solidariteti me popullin ukrainas’, thotë zyra e shtypit të kryeministrit Xhonson.

Zyra e shtypit të presidentit Zelenski thotë se ata kanë mbajtur ‘takim kokë më kokë’.

Dy liderët kanë diskutuar për ndihmën që Mbretëria e Bashkuar do të ofrojë në terma afatgjatë për Ukrainën dhe pritet që Xhonson të bëjë të ditur një paketë të re financiare dhe ndihma ushtarake.

Surprise 😉 pic.twitter.com/AWa5RjYosD

— Embassy of Ukraine to the UK (@UkrEmbLondon) April 9, 2022

“The Guardian” shkruan se Xhonson mund të ketë udhëtuar për në Kiev nga lindja e Polonisë.

Kryeministri britanik është një figurë popullore në Kiev pasi i ka ofruar Ukrainës armatime kundër tank.

Situata në kryeqytetin e Ukrainës është e stabilizuar pas tërheqjes së forcave ruse nga pozicionet e tyre më 29 mars.

Ata braktisën qytetet Buça dhe Gostomel në veriperëndim të Kievit duke u tërhequr në Bjellorusi.

Që prej atëherë, sulmet me artileri në qytet janë ndalur.

Të premten, Kievin e vizitoi Presidentja e KE, Ursula von der Leyen bashkë me përfaqësuesin e Politikave të Jashtme, Josep Borrell.