Borrell takon krerët e Ballkanit Perëndimor në Nju Jork, zbardhen diskutimet

Përfaqësuesi i Lartë për Punët e Jashtme dhe Politikën e Sigurisë Joseph Borrell priti në një takim jozyrtar liderët e Ballkanit Perëndimor të martën në Nju Jork, në kuadër të Asamblesë së Përgjithshme të Kombeve të Bashkuara (UNGA). Këtë vit morën pjesë të gjashtë presidentët nga rajoni.

Faqja zyrtare e Bashkimi Europian bëri me dije se diskutimi u përqendrua rreth sfidave aktuale gjeopolitike globale që dominojnë axhendën në OKB këtë javë dhe u fokusua gjithashtu në zgjerimin dhe idetë rreth integrimit gradual të partnerëve në Bashkimin Evropian.

“Përfaqësuesi i Lartë Borrell dhe liderët e Ballkanit Perëndimor diskutuan se si të trajtohen së bashku pasojat e dëmshme të luftës së Rusisë kundër Ukrainës mbi çmimet e ushqimit dhe energjisë, si dhe mbi stabilitetin dhe sigurinë në Evropë dhe globalisht. Përfaqësuesi i Lartë Borrell theksoi mbështetjen që BE-ja po u jep vendeve të Ballkanit Perëndimor në lidhjen e plotë të rajonit me iniciativat e saj për të zbutur ndikimin e agresionit të Rusisë dhe në adresimin e sfidave të tjera, duke përfshirë sigurinë energjetike, sigurinë ushqimore dhe ndryshimet klimatike. Përfaqësuesi i Lartë Borrell nënvizoi rëndësinë e bashkëpunimit të ngushtë në forume shumëpalëshe. Në këtë kontekst, ai rikujtoi se Bashkimi Evropian mbështet të gjitha vendet kandidate si partnerë të besueshëm edhe në politikën e jashtme, të sigurisë dhe të mbrojtjes, duke përfshirë edhe përafrimin me vendimet e BE-së në këto fusha”, thuhet nga BE.

Në takim morën pjesë presidenti i Shqipërisë Bajram Begaj, kryetari i Presidencës së Bosnjës dhe Hercegovinës Zheljko Komshiç, presidentja e Kosovës Vjosa Osmani-Sadriu, presidenti i Malit të Zi Jakov Milatoviç, presidenti i Maqedonisë së Veriut Stevo Pendarovski dhe ai i Serbisë Aleksandër Vuçiç.

LEXONI GJITHASHTU:

• Thirrja e Borrell: Të nisë zbatimi i marrëveshjes bazuar në propozimin tonë
• Ministrat akuza ndaj Borrell: Po mbani anën e Serbisë