‘Botë e errët’, 8-vjeçarja rrëfen e përlotur dhimbjen për shembjen e banesës

Që nga e mërkura, gjithçka ka ndryshuar për familjen Feta në zonën e 5 Majit. Ajo që mund të quhet jete e re, e 8 anëtareve të kësaj familjeje është mes rrënojave dhe strehës së tyre të re me qira aty pranë.

Amina 8 vjeçe nuk arrin ta besojë se nuk ka më dhomën e saj, këndin ku mësonte, ku luante. Fadromat nuk i kanë rrënuar vetëm shtëpinë, por edhe kujtimet.

“Më erdhi keq për shtëpinë se kam jetuar shumë gjatë këtu. Këtu kam jetuar gjithmonë. Këtu kam pasur shumë kujtime të bukura”, shprehet ajo.

Ndërsa prek rrënojat, duket sikur do të mbledhë copëzat e kujtimeve që mbarte streha e saj e dikurshme.

“Bëja detyrat dhe më pas dilja dhe luaja”, tregon vajza e vogël me lot në sy.

Amina është e trishtuar jo vetëm për veten, por për edhe për gjyshin e saj, që e shoqëron sa herë që ajo dëshiron të shkojë tek rrënojat.

“Vetëm është mërzitur dhe trishtuar, pi ilaçet, shtrihe, çohet. Një botë e errët ku s’ke ku të lëvizësh, shumë e dhimbshme që të shikosh tënde që t’i jep jetën për të ta shikosh duke u shembur”, tregon ajo.

Qemal Feta në gjendje të ngarkuar psikologjike e ka të vështirë të pranojë që puna dhe mundi i një jetë u shua papritur.

“Na ka në shkatërruar objektin pa firmosur fare”, tregon ai.

Ai thotë se i ka humbur shpresat se do ta shohë sërish familjen e tij në një shtëpi të tyren. Pak metra me tutje është banesa ku ata rrine me qira.

“Nusja ka 4 kalamaj të vegjël, si do e përballojmë? Qiraja është 200 mijë lekë”, tregon i moshuari.

Që prej 1989 i vendosur në këtë zonë, i moshuari nuk ka mundur ta legalizojë edhe pse ka tentuar shumë herë.

Tashmë me çështjen të hedhur në gjyq familja Feta nuk pranon të firmosin marrëveshje me bashkinë.

LEXONI GJITHASHTU:

• Rama premton kompensim për banorët e 5 majit pa pronësi të shtëpive