Brataj: Qytetarët rrezikohen nga përdorimi i emrave të mjekëve për produkte të rreme

Shoqatat mjekësore kanë dhënë alarmin se persona të ndryshëm, përfshirë edhe mjekë popullorë, po abuzojnë në dëm të shëndetit të qytetarëve.

Ata kërkojnë ndërhyrje nga shteti dhe dënimin e abuzuesve, ndërsa theksojnë se pacientët shqiptarë janë gjithnjë e më të ekspozuar ndaj dezinformimit mbi trajtimin e sëmundjeve.

Kryetari i Shoqatave Mjekësore, njëherazi edhe Drejtor i Urgjencës Kombëtare, Skënder Brataj, në një intervistë për Euronews Albania u shpreh se emrat e mjekëve të ndryshëm po përdoren në mënyrë të paligjshme nga persona të paidentifikuar për të reklamuar preparate të ndryshme jo-mjekësore, që pretendohet se trajtojnë sëmundje të ndryshme.

Një tjetër shqetësim serioz, sipas tij, është përhapja e praktikave të mjekësisë alternative, e njohur ndryshe si mjekësi popullore, e cila po dëmton pacientët duke zëvendësuar trajtimet mjekësore të provuara me metoda të pasigurta.

Përballë kësaj situate, Shoqatat Mjekësore kanë propozuar hartimin e një ligji që dënon çdo formë abuzimi që vihet re në dëm të shëndetit publik.

LEXONI GJITHASHTU:

• Shtohen urgjencat nga vapa. Brataj: Kujdes nga dehidratimi
• Brataj: Koordinimi i nevojshëm për reagimin ndaj incidenteve kimike dhe nukleare