Brdaric ëndërron finalen e Kupës së Shqipërisë, Vllaznia e plotë përballë Dinamos

Të mërkurën zhvillohen ndeshjet e kthimit në gjysmëfinalet e Kupës së Shqipërisë, ku Dinamo përballet me Vllazninë në stadiumin “Elbasan Arena”, ndërsa Partizani udhëton drejt Rrogozhinës për të sfiduar Egnatian.

Katër skuadrat që ndodhen edhe në fazën “Final 4” të kampionatit, përballen kësaj here në një tjetër kompeticion prestigjioz: Kupën e Shqipërisë.

Shkodranët, të udhëhequr nga trajneri Thomas Brdaric, e konsiderojnë trofeun e Kupës si një kurorëzim të punës së bërë gjatë gjithë sezonit.

“Është momenti të marrim atë për të cilën kemi punuar që nga fillimi i sezonit. Ndeshja e parë u mbyll 0-0 në shtëpi, ndaj në Elbasan duhet të jemi maksimalisht të përqendruar si në sulm, ashtu edhe në mbrojtje,” u shpreh Brdaric.

Trajneri theksoi gjithashtu se skuadra është përgatitur për çdo skenar, edhe në rast se ndeshja shkon përtej kohës së rregullt.

“Punojmë fort për ta mbyllur ndeshjen brenda 90 minutave, por jemi të gatshëm edhe për më shumë. Jemi të përgatitur fizikisht dhe psikologjikisht. Lojtarëve u kujtoj të jenë të disiplinuar dhe të luajnë me pasion për këtë sfidë të veçantë,” shtoi ai.

Nga ana tjetër, kapiteni Bekim Balaj vlerësoi se kjo ndeshje mund të ketë tre rezultate, ndaj kërkon përqendrim maksimal.

“Kjo është një finale për ne. Pas 0-0 në Shkodër, gjithçka është e hapur. Kemi një gjendje të mirë psikologjike dhe do të luftojmë për vendin e dytë në ‘Final 4’. Jemi të gatshëm të japim më të mirën,” tha Balaj.

Ndërkohë, në sfidën tjetër të gjysmëfinaleve, Egnatia do të kërkojë të përmbysë humbjen minimale 0-1 ndaj Partizanit, në një tjetër përballje të fortë që do të përcaktojë finalistët e Kupës së Shqipërisë.

LEXONI GJITHASHTU:

• “Te Vllaznia po jetoj një ëndërr”, talenti Kevin Dodaj: Dua të ndjek hapat e Balajt
• Kupa e Shqipërisë 2024-2025/ Hidhet shorti për fazën gjysmëfinale, caktohen çiftet