Broja kthehet në sulmin kuqezi, Sylvinho konfirmon zgjedhjet e “njëjta” ndaj Kilit 

Pas mbërritjes në Parma, Kombëtarja zhvilloi seancën e fundit përpara miqësores me Kilin në Tardini mbrëmjen e sotme, seancë që i shërbeu trajnerit Sylvinho për qartësimet e fundit për formacionin e sfidës.

Gjatë kësaj kohe në krye të kuqezinjve kemi mësuar se braziliani nuk i pëlqen ndryshimet e mëdha.

Në këtë mënyrë formacioni i mundshëm për mbrëmjen e sotme pritet të fillojë me Strakoshën në portë. Aktivizim që lidhet edhe me pamundësinë e gatishmërisë së Berishës që u zëvendësua nga Sherri në momentin e fundit.

Në mbrojtje në vijë të drejtë, qendra do ti besohet eksperiencës së Gjimshitit dhe freskisë së Mihajt. Ndërsa nga krahët do të vendosen Mitaj në të majtë dhe Hysaj në krahun e djathtë. I pari në radarët e Juventus dhe i dyti që duhet të fitojë besimin e Tudor te Lazio.

Përpara mbrojtjes pritet të luajnë Asllani dhe Ramadani. I pari në një sezon të kënaqshëm te Inter, tjetri një lider te Lecce që në sezonin e 1’rë. Mesfusha do të plotësohet nga Seferi në të majtë, Bajrami në qendër dhe Asani ende pa minuta në klub, në të djathtë.

Sulmi duket se do të jetë i tëri i Brojës, që atë çka nuk e ka treguar në Londër duhet ta shfaqë me kuqezinjtë.