“Çaushesku u strehua në ambasadën shqiptare!” Na rrethuan me tanqe…

Rezear Xhaxhiu kësaj here vjen në ekranin tonë të televizorit në rolin e rrëfimtarit dhe jo moderatorit! Ai në Profil rrëfeu se si ‘biografia e mirë’ ja kurseu ca vuajtje të atyre viteve dhe e çoi në Bukuresht si diplomat.

Aty u bë dëshmitar i revolucionit dhe pushkatimit të Çausheskut…por dhe kishte kuptuar se fundi i regjimit komunist po vinte dhe për Shqipërinë. Jeta i ndryshoi shpejt pas kthimit në Shqipëri ku u bë gazetar por u përball me plot sfida…të cilat nuk ngurroi t’i tregonte të gjitha në Profil për gazetaren Greta Topjana.

“Unë aty isha dëshmitar okular i asaj që u quajt revolucion romun për rrëzimin e Çausheskut.

Filluam atje, ishin dy javë të tensionuara, ishte luftë dhe nuk e dije se çfarë do të të ndodhte. Ishte një mini 97’ që u bë këtu në Shqipëri por ajo u bë kryesisht në Bukuresht. Ne zgjoheshim në mëngjes me aromën e barutit në kuzhinë sepse ka pasur të shtëna një natë përpara. Ndodhën disa ngjarje në 10-15 ditë ku që nga momenti i parë kur filloi revolta në Bukuresht derisa pushkatuan Çausheskun, e kam prekur revolucionin sepse kam qenë dëshmtar.

U krijua një tension tek personeli i ambasadës i cili u reflektua në atë që u quajt mbrojtja me armë që i duhej bërë selisë, ambasadës. Jemi në 1989 kur ndodhën ngjarjet. U hap fjala se Çaushesku ishte strehuar në ambasadën shqiptare në Bukuresht. Kaq mjaftoi që ne ta shikonim ambasadën të rrethuar me tanke, me trupa, u çuditëm. Ambasadori u detyrua të merrte një takim në Ministrinë e Jashtme për të pyetur se çfarë po ndodh. Teksa i thanë që Çaushesku ndodhet në ambientet e brendshme, i thanë që ishin të detyruar të bëjnë kontroll. Ambasadori po shjegonte se ambasada është një shtet dhe nuk e kanë të drejtën të hyjnë as deri në oborr jo në banesë”, u shpreh Rezear Xhaxhiu.

Ai u ndal gjithashtu në detajet e armëve që mbanin për të mbrojtur duke treguar kështu dhe tensionin që ishte krijuar mes gjithë situatës kaotike.

“Çdo ambasadë e Republikës Popullore Socialiste të Shqipërisë kishte një arkë me municion atë kohë dhe ne kishim arkën tonë. Arkën, e pa hapur ndonjëherë, e pashë që kishte një arsenal të vogël si pushkë, kallashnikov, pistoletë, ndonjë bombë, një pjesë e të cilave i kishte zënë ndryshku.

Me këto duhet të mbronim dhe ambasadori më tha se: “Ke këtë karabinën dhe pozicioni yt është në katin e dytë”, dhe i thashë: Ambasador më duket se është pak e ndryshkur, më duket se nuk funksionon dhe më tha që ta mbaj sepse më jep siguri.

Rumunët e kuptuan që ishte një idiotësi e madhe lidhur me Çausheskun sepse në kohën që ambasada jonë ishte e rrethuar, ai u kap në të dalë të Bukureshtit, iu bë gjyqi dhe u pushkatua”, tha gazetari dhe moderatori Rezear Xhaxhiu.

LEXONI GJITHASHTU:

• Arkiva e Rezarta Reçit nga 750 intervista te beteja me kancerin…|PROFIL
• Nga Parisi në Gramsh, kapitujt e jetës së Edmond Tupes… | PROFIL