Celibashi për votën e diasporës: Brenda 16 prillit nisen zarfet tek emigrantët

Në përfundim të procesit të regjistrimit të Diasporës, Komisioneri Shtetëror i Zgjedhjeve, Ilirjan Celibashi ka bërë një rezyme të të gjithë procesit, duke theksuar se brenda javës së ardhshme pritet që të përzgjidhet kompania ndërkombëtare që do të marrë përsipër procesin e dërgimit të zarfeve tek emigrantët dhe kthimin e tyre në KQZ. Celibashi tregoi edhe kohën kur pritet të nisë dërgimi i zarfeve.

“Midis fundit të javës së parë të prillit dhe javën e dytë të prillit do të dërgojmë fletët e votimi dhe dokumentacionin tjetër zgjedhor për votuesit nga jashtë. Synojmë që deri mes datës 8-16 prill të përfundoj procesi i dërgimit të fletëve të votimit nga jashtë. Besoj deri në fund të javës tjetër ne do të kemi përfunduar procedurat që lidhen me përzgjedhjen e operatorit të shërbimit postar”,-tha Ilirjan Celibashi, Komisioneri Shtetëror i Zgjedhjeve.

Në lidhje me madhësinë e fletës së votimit, Komisioneri Celibashi theksoi se kjo do të varet nga numri i subjekteve zgjedhore që do të regjistrohen në zgjedhje bashkë me listën e kandidatëve.

“Edhe ashtu sikurse është sot fleta e votimit, ka probleme të administrimit të fletës së votimit. Ajo është vërtet shumë e madhe”,-tha Celibashi.

Por në regjistrimin e emigrantëve, Komisioneri Celibashi tregoi edhe disa rekorde që ishin shënuar gjatë këtij procesi.

“Aplikimi i parë është bërë nga një shtetas nga Gjermania që ka bërë aplikimin në 11 janar në orën 00:08 pas mesnate. Shtetasi me moshën më të madhe që ka aplikuar është një shtetas 98 vjeç”,-tha Celibashi.

Në total, të drejtën e votës nga diaspora pas përfundimit të procesit të regjistrimit e kanë fituar 245,975 shqiptarë, nga 294 155 që shprehën interesin për t’u përfshirë në proces.

LEXONI GJITHASHTU:

• Strategjia kundër krimeve zgjedhore, Celibashi takim me Dumanin
• Celibashi: Fleta e votimit vjen me postë në mes të prillit, 6 ditë për ta plotësuar