Censi në bashkinë Pustec, partia MIE kërkon zgjatjen e procesit

Partia Maqedonase për Integrim Europian ka kërkuar shtyrjen përtej afateve të përcaktuara për procesin e regjistrimit të popullsisë dhe banesave në zonën e Pustecit, për shkak se shumica e banorëve të kësaj bashkie janë të punësuar sezonalë në Maqedoninë e Veriut dhe Greqi.

Sipas nënkryetarit të kësaj partie, Eftim Mitrefski, kjo gjë ka bërë të vështirë kontaktin me regjistruesit e INSTAT, të cilët jo në pak raste nuk i kanë gjetur në banesa qytetarët.

I pyetur nëse këtë shtyrje, kjo parti, e kërkon edhe për banorët e kësaj bashkie që posedojnë pasaporta bullgare dhe punojnë në vendet e BE, Mitrefski ka thënë shkurt se qeveria shqiptare zyrtarisht në bashkinë e Pustecit njeh si pakicë kombëtare vetëm maqedonasit.

Në zyrën e gjendjes civile janë të regjistruar më shumë se 5000 shtetas që i përkasin minoritetit maqedonas.

Kujtojmë që një ditë më parë INSTAT ka shtyrë deri në 15 nëntor afatin e mbledhjes së të dhënave në terren. Njoftimin e bëri vetë drejtoresha e këtij institucioni Elsa Dhuli, e cila tha se shtyrja me dy javë e procesit vjen pasi 3% e zonave nuk janë numëruar.

LEXONI GJITHASHTU:

• Regjistrimi i popullsisë drejt mbylljes në Pustec
• “Censi me probleme”, Dule: Identifikimi i pakicave ka shkelje të të drejtave