Çështja e detit| Eksperti: Të dalim nga Haga, të kërkojmë ndërmjetësim amerikan

Duke komentuar çështjen e detit, eksperti i marrëdhënieve ndërkombëtare, Agron Alibali tha në një intervistë për Euronews Albania se është më mirë që Shqipëria të tërhiqet nga negocimi në Hagë.

Sipas tij është më e udhës që vendi të kërkojë ndërmjetësim nga Shtetet e Bashkuara të Amerikës.

“Gjykata e Hagës kur nis procedurat atje vazhdon për një kohë të gjatë, mund të zgjasë deri në 5 vjet. Në të njëjtën kohë Gjykata e Hagës është një forum shumë i kushtueshëm. Unë kam hedhur idenë që kjo çështje të gjykohet në tribunalin e Hamburgut. Duke pasur parasysh disa zhvillime të kohëve të fundit që kanë ndodhur në Mesdheun lindor, ndoshta rruga më e mirë do të ishte që Shqipëria të tërhiqet nga kjo marrëveshje, siç e ka quajtur Dendias dhe t’i kthehet tryezës së bisedimeve dhe ndoshta edhe nëpërmjet një ndërmjetësimi nga ana e Shteteve të Bashkuara të Amerikës,” – u shpreh Alibali.

Çështja e detit me Greqinë është një nga çështjet më të rëndësishme ndërkombëtare për Shqipërinë.

Ministri i Jashtëm grek, Nikos Dendias ka deklaruar së fundmi se pret zhvillime brenda vitit 2023. Deklaratat e tij dhanë disa detaje të reja që, si gjithmonë, për këtë çështje, vijnë nga Athina dhe asnjëherë nga Tirana.

LEXONI GJITHASHTU:

• Alibali: Shqipëria të mos lëshojë pe ndaj Greqisë, të mbrojë sovranitetin e saj
• Kapet me rreth 9 kg heroinë me vete, arrestohet shqiptarja në Greqi