Çështja “Gyokeres” merr fund, sulmuesi i bashkohet Arsenalit

Viktor Giokeres do të transferohet tek Arsenali, me palët të cilat kanë arritur akordin me njëra-tjetrën, ndërsa sulmuesi suedez do të firmosë një kontratë 5-vjeçare.

U duk se çështja do të zgjaste e në fund pa zgjidhje, por mosbindja e Viktor Gyokeres u shpërblye, pasi Sportingu i Lisbonës ka vendosur ta lërë futbollistin të largohet, me këtë të fundit që do të jetë pjesë e Arsenalit.

Palët kanë arritur akordin me njëra-tjetrën dhe 27-vjecari do të vendoset në ditët e ardhshme nën urdhrat e Mikel Artetës, ndërsa siç është raportuar në mediat britanike, është bërë gjithçka që lojtari të mbërrijë sa më shpejt.

Gyokeres do të firmosë një kontratë 5-vjecare, ndërsa portugezët do të përfitojnë plot 63.5 milionë euro dhe 10 të tjera në formë bonusesh. Lojtari e kërkonte me ngulm largimin, madje bindi menaxherin e tij që të hiqte dorë nga komisioni i plotë, ndërsa thuhet që 2 milionë euro nga kartoni janë paguar nga vetë sulmuesi.

Sportingu i Lisbonës këmbëngulte vazhdimisht se futbollisti suedez kushton 100 milionë euro, por ishte vetë Gyokeres që i njoftoi drejtuesit se nuk do të kthehej më dhe se dëshironte vetëm topçinjtë. Manchester United bëri dy oferta në drejtim të tij, por lojtari refuzoi ti bashkohej djajve të kuq, e në këtë pikë fati ishte me goonersat. Gyokeres pritet të prezantohet në ditët në vijim, ku dhe do të hedhë firmën në letër.

LEXONI GJITHASHTU:

• Champions League, PSG dominon dhe fiton ndeshjen e parë ndaj Arsenalit në Londër
• Kampionati Evropian për femra, Anglia finalistja e parë