Çfarë po diskutojnë? Kurti konsumon kafe me Ali Ahmetin para takimit me Vuçiçin

Kryeministri i Kosovës, Albin Kurti ka zhvilluar një takim joformal me kreun e Bashkimit  Demokratik për Integrim (BDI), Ali Ahmeti në Ohër të Maqedonisë së Veriut.

Kurti dhe Ahmeti shihen duke konsumuar një kafe, teksa i pranishëm është edhe ministri i Jashtëm i Maqedonisë së Veriut e zyrtarë të tjerë.

Takimi i tyre vjen pak para takimit që Kurti do të zhvillojë me presidentin e Serbisë, Aleksandër Vuçiç, në kuadër të dialogut mes dy vendeve, ndërmjetësuar nga Bashkimi Evropian.

Të dy liderët konfirmuan pjesëmarrjen e tyre në këtë takim, i cili do të fillojë në orën 10:00.

Përfaqësuesi i Lartë i BE për Politikë të Jashtme dhe Siguri, Josep Borrell dhe i dërguari i BE për dialogun Kosovë-Serbi, Miroslav Lajçak do të zhvillojnë takime me secilin nga liderët, duke filluar nga ora 10:30.

Më pas, do të ketë një takim trepalësh. Takimi do të fokusohet në finalizimin për zbatimin e aneksit të planit evropian për rrugën drejt normalizimit të marrëdhënieve ndërmjet Kosovës dhe Serbisë.

Në fund të takimit do të ketë një deklaratë për mediat nga Borrell.

LEXONI GJITHASHTU

• Kurti dhe Vuçiç takohen sot në Ohër për planin evropian

• BE publikon agjendën për takimin Kurti-Vuçiç më 18 mars
• “Pakicat bullgare në Kushtetutë”, BE: Maqedonia e Veriut në rrugën e duhur