Arsenali ka marrë një fitore spektakolare në shtëpi përballë Realit të Madridit në shifrat 3-0, duke hedhur një hap të sigurt drejt gjysmëfinaleve të Champions. Në përballjen tjetër të luajtur në Mynih, Interi fitoi 2-1 përballë Bajernit.
Një fitore spektakolare në favor të Arsenalit, me 3 supergola dhe me madrilenët që do të duhet të bëjnë remontadë në shtëpi, kjo është panorama e duelit të zhvilluar në “Emirates”, aty ku ekipi i Artetës ishte perfekt. Topçinjtë zhvilluan një ndër paraqitjet më të kompletuara në historinë e tyre në Champions, ndërsa goditën “Los Blancos” nëpërmjet goditjeve standarde. Declan Rice ishte heroi i Arsenalit, pasi realizoi një dopietë magjike, të dyja me goditje dënimi, duke mposhtur portierin Courtois.
Pjesa e parë u mbyll me rrjeta të paprekura, me disa mundësi të shpërdoruara nga të dyja ekipet. Në të dytën erdhën të 3 golat, ku krahas Rice ishte Merino që vulosi fitoren 3-0 e dha një shuplakë të fortë Ancelottit dhe të tijve. Paralelisht u luajt dhe sfida Bayern Munchen-Inter, edhe aty spektakli nuk mungoi, e ashtu siç ndoshta nuk pritej, zikaltërit morën një fitore me shumë vlerë. Skuadra e Kompany u mundua të vendoste në vështirësi kundërshtarin, por nuk ia doli, e në minutën e 38’ Lautaro kaloi përpara milanezët.
5 minuta para fundit, legjenda bavareze Thomas Muller riktheu ekuilibrat, por skuadra tentoi të regjistronte përmbysje, e pësoi një gol me kundërsulm me autor Frattesin. 1-2 dhe Inter fiton në Mynih, ndaj një kundërshtari që vinte me 5 mungesa në këtë çerekfinale. Sa i përket kualifikimit, asgjë nuk është mbyllur, pasi të mërkurën, pas 1 jave, luhen duelet e kthimit.
