Chelsea interesohet për Vini Jr, ka gati ofertën për Real Madrid

Një plan i vështirë për tu realizuar, por jo i pamundur është ai i Chelsea-s, që dëshiron të transferojë në Stamford Bridge një ndër lojtarët më të mirë të botës, brazilianin Vini Jr.

Situata e këtij të fundit në Madrid nuk është pozitive dhe shpesh është përfolur për një largim të mundshëm, ndërsa interesi ka qenë i madh. Arabia Saudite gjithmonë është aty për ta bërë të vetin sulmuesin anësor, por ky i fundit ka deklaruar se është ende herët për të braktisur Evropën.

Në këtë moment, Chelsea ka gati 160 milionë euro për presidentin Perez dhe një pagë të kënaqshme për Vini Jr, i cili në vitin 2025 nuk është se ka bërë aq mirë sa më herët. Megjithatë braziliani mbetet një ndër lojtarët më të preferuar në botën e futbollit.

Në rast se 25-vjecari do të pranonte, po ashtu dhe klubi i galaktikëve, atëherë do të bëhej futbollisti më i shtrenjtë i blerë nga një ekip i Premier League. Kjo gjë pak gjasa ka që të ndodhë pasi Reali nuk dëshiron ta lërë të largohet, duke mos përsëritur gabimin me CR7 që kaloi në Torino te Juventus vite më herët.