Ministri i Brendshëm i propozon Ramës emrin për Drejtorin e ri të Policisë

Ilir Proda është kandidati për Drejtor të Përgjithshëm të Policisë, të cilin ministri i Brendshëm, Ervin Hoxha, ia ka propozuar kryeministrit Rama.

Proda është një nga pesë kandidatët më të vlerësuar nga Komisioni i Posaçëm për pozicionin e Drejtorit të Përgjithshëm të Policisë së Shtetit. Pas vlerësimit të tij gjatë seancave dëgjimore dhe verifikimit të pastërtisë së figurës nga institucionet përkatëse, Ministri i Brendshëm ka vendosur ta propozojë atë si kandidatin kryesor për këtë pozicion.

Kandidatura e Prodës do t’i përcillet Këshillit të Ministrave për shqyrtim dhe vendimi përfundimtar për emërimin e tij pritet të merret në mbledhjen e ardhshme të Qeverisë.

Kush është Ilir Proda – Kandidati për Drejtor të Përgjithshëm të Policisë së Shtetit:

Edukimi dhe Formimi Profesional:

• 2002-2005: Akademia e Policisë

Karriera Profesionale:

• Gusht 2005 – Nëntor 2011: Komisariati Nr. 3 Tiranë
• Nëntor 2011 – Mars 2012: Komisariati Nr. 4 Tiranë
• Mars 2012 – Qershor 2013: Drejtoria e Përgjithshme e Policisë së Shtetit, Seksioni kundër krimeve ndaj jetës dhe lirisë së personit
• Qershor 2013 – Tetor 2013: Policia e Lezhës
• Tetor 2013 – Dhjetor 2014: Shef, Komisariati Nr. 2 Tiranë
• Dhjetor 2014 – Shkurt 2016: Shef, Komisariati Bulqizë
• Shkurt 2016 – Maj 2017: Seksioni për hetimin e narkotikëve, Drejtoria e Përgjithshme e Policisë së Shtetit
• Maj 2017 – Korrik 2019: Njësia për hetimin e krimeve kundër personit dhe pasurisë, Drejtoria e Përgjithshme
• Korrik 2019 – Tetor 2021: Zv.Drejtor për hetimin e krimit në Korçë
• Tetor 2021 – Mars 2023: Zv.Drejtor për hetimin e krimeve në Elbasan
• Mars 2023 – Vazhdon: Drejtor i Drejtorisë Vendore të Policisë së Elbasanit

NJOFTIMI i PLOTË:

Në mbështetje të ligjit Nr. 82/2024 “Për Policinë e Shtetit”, si dhe Udhëzimit të Ministrit të Brendshëm Nr. 160, datë 2.9.2024 “Për përcaktimin e rregullave dhe procedurave për përzgjedhjen e kandidatit për Drejtor të Përgjithshëm të Policisë së Shtetit”, Ministria e Brendshme shpalli thirrjen publike për aplikim për pozicionin e Drejtorit të Përgjithshëm të Policisë së Shtetit.

Komisioni i Posaçëm i ngritur sipas parashikimit të të njëjtit ligj, zhvilloi seanca dëgjimore me qëllim vijimin e procesit të vlerësimit për 11 kandidatët e kualifikuar, sipas kritereve të këtij procesi. Seancat dëgjimore u ndoqën nga misionet partnere pranë Ministrisë së Brendshme dhe Policisë së Shtetit, ICITAP dhe EU4LEA, në rolin e vëzhguesit të procesit.

Komisioni i Posaçëm kreu verifikimin e pastërtisë së figurës për të gjithë kandidatët e kualifikuar, duke kërkuar të dhënat përkatëse nga organet ligjzbatuese si vijon: Prokuroria e Posaçme Kundër Korrupsionit dhe Krimit të Organizuar (SPAK), Prokuroria e Përgjithshme, Shërbimi Informativ Shtetëror (SHISH), Drejtoria e Përgjithshme e Policisë së Shtetit (DPPSH), Agjencia e Mbikëqyrjes Policore (AMP), Agjencia e Informacionit të Sigurisë së Mbrojtjes (AISM).

Në fund të këtij procesi, ditën e premte 27.09.2024, Komisioni i Posaçëm i dorëzoi në bazë të ligjit Ministrit të Brendshëm listën me 5 kandidatët më të vlerësuar, paraqitur si më poshtë sipas rendit alfabetik:

• Z. Altin Mena
• Z. Ardian Çipa
• Z. Ilir Proda
• Z. Neritan Nallbati
• Z. Skënder Hita

Ministri i Brendshëm do t’i përcjellë Këshillit të Ministrave, si kandidat për Drejtor të Përgjithshëm të Policisë së Shtetit, z. Ilir Proda dhe vendimi i Qeverisë për këtë kandidaturë do të merret në mbledhjen e radhës.

LEXONI GJITHASHTU:

• Zbardhen emrat e kandidatëve për Drejtor të Përgjithshëm të Policisë së Shtetit
• Shpallet në kërkim kandidati për Drejtor i Përgjithshëm i Policisë