Cili është lajmi i keq për Gjermaninë? /Pedagogu Muçi zbardh skenarët e pasigurisë!

Pedagogu Redi Muçi, i ftuar në emisionin ‘Review” ka treguar se në këndvështrimin e tij, rritja që ka pësuar AfD-ja në zgjedhjet e Gjermanisë krahasuar me zgjedhjet e shkuara, mund të cilësohet si një lajm i keq për të ardhmen e atij vendi.

Nga ana tjetër ai tha se pozitiv është fakti që partia e majtë ka pësuar një dyfishim në rezultatet e saj.

“Lajmi i keq padyshim është rritja e AfD-së. Sa herë kemi një parti të ekstremit të djathtë që rritet në Gjermani ky është lajm i keq, jo vetëm për Gjermaninë por dhe më gjerë.

Ndërsa lajmi i mirë mund të them se është dyfishimi që ka pësuar partia e majtë në Gjermani që më duket se ka qenë një reagim për shkak të rritjes që ka pasur AfD-ja. Kryefjala e kësaj fushate zgjedhore për fat të keq ka qenë imigracioni, për këtë çështje janë detyruar të pozicionohen mjaft djathtas edhe liderët e CDU-së”, tha pedagogu.

Muçi gjithashtu theksoi se situata ekonomike në Gjermani nuk është në nivelin e duhur dhe se ka dy vjet që nuk pëson rritje ekonomike.