Është çelur edicioni i katërt u çmimeve “Lumo Skëndo”, në qendrën Kombëtare e Librit dhe Leximit.
Ky edicion që risjellë në vëmendje veprën dhe emrin e një personaliteti të madh sikurse ishte Mid’hat Frashëri, ka në fokus gjykimin e veprave më të mira të vitit në fushën e publicistikës dhe eseistikes.
“Ky çmim vjen për të nderuar jo vetëm një figurë madhore sikurse është Mid’hat Frashëri, por edhe për t’i dhënë rëndësi veprave të kategorisë si publicistika apo eseistika që kanë një ndikim në shoqëri, si vepra ideore”,-tha Alda Bardhyli, drejtoreshë e QKLL.
Kryetarja e këtij edicioni Belina Budini ftoi botuesit të sjellin veprat e publikuara në publicistikë teksa theksoi se juria ashtu si edhe vlerësimi për këtë çmim është mjaft demokratike.
“Ky çmim është një rast për ta sjellë institucionin e gjykimit kulturor në një nivel të lartë në hapësirën publike shqiptare për vetë faktin se kjo figurë intelektuale e shumanshme përbën një imazh si gur themeli, duke qenë një nga etërit e kombit shqiptar. Është një figurë thellësisht demokratike, që na ka bërë edhe ne si juri të jemi thellësisht demokratik, të ftojmë dhe të kemi gjithmonë kontribute nga intelektualë, publicistë, eseistë, studiues të të gjithë spektrit, pavarësisht angazhimeve të tyre politike”,-tha Belina Budini, dekania e shkencave humane në UET.
Anëtarë të kësaj jurie do të jenë dhe akademiku Anastas Angjeli, historiani Uran Butka, gazetaret Aida Tuci dhe Rudina Xhunga.
Në këtë takim, u prezantua dhe vëllimi i dhjetë i veprës diplomatike, letrare dhe publicistike të Mid’hat Frashëri, botim i Institutit të Studimeve Historike “Lumo Skëndo”.
Çmimi “Lumo Skëndo” do të ndahet në 25 mars, në 145 vjetorin e lindjes së shkrimtarit të madh.
LEXONI GJITHASHTU:
- Mjeshtri gurgdhendës, 20 vite duke skalitur rrugicat në Gjirokastër
- Efektet e mbylljes së TikTok, sociologët: Do bëhen agresivë, të merren me aktivitete
