Çmimi ul prodhimin e grurit. Fermerët e Maliqit: Nuk ka treg, po na mbetet stok

Çmimi i grurit edhe këtë vit në juglindje të vendit është shumë i ulët, aq sa nuk justifikon koston e prodhimit.

Në qoftë se një vit më parë një kilogram grurë shitej deri në 26 lek, këtë vit në maksimum shkon 22 lek për kilogram. Në kushte të tilla, fermerëve u duhet ta shesin me çmim nën kosto.

“Është shumë i ulët, me shume krunde sesa gruri. 27 krunde, 23 lek gruri. Nuk ka çmim e kërkesë. Nuk vjen tregtari. Vjet ky çmim është vërtitur, shumë keq. Nuk ja vlen te mbjellësh me asgjë. Tokat me 100 e ca, nuk merr dot hakun. Sfilitesh gjithë beharin”,-tha Ervis Veri.

“Gruri vjet ishte 25, sivjet as me 20. Nuk e merr askush. Një mulli është. Ai nuk del në skenë se i mbetet atij. Ai kërkon për veten e tij”,-tha fermeri përparim Dulo.

“Çmimi i grurit flitet me 20-22, kjo është katastrofë. Me 22 lek nuk vlen ta mbjellësh, qira, plehra, plugimi, mbjella, pesticidet, elbicidet. Çdo bëjmë hiç? Nuk ka as treg. Nuk e di, sjellin nga jashtë”,-Femi Xhango, fermer.

Skënder Hamzaj është një nga fermerët superpotenciale të fushës së Maliqit. Ai tha se ka akoma të pa shitur sasi të grurit të dy viteve të fundit. E gjithë kjo sipas tij ka ardhur për shkak të çmimit të ulët dhe mungesës së tregut.

“Ky është i vjetshmi, i vjetshmi dhe i parvjetshmi. S’ka treg, s’ka çmim, këtë vit gjendja me keq, skandal. Çmimi qe flitet midis 20-22 lek. Pa fitim, të marrësh rendiment maksimal, të jetë më 30, nuk mbyllim dot shpenzimet. Kjo është gjendja. I kemi shitur nën kosto. S’kemi ç’bëjmë. Vetëm qeveria me mekanizmat e saj mund të marrë masa”, Skënder Hamzaj, fermer.

Në vitin 2023 në fushën e Maliqit kanë qenë të mbjella 4000 hektarë me grurë, ndërsa këtë vit 3300 hektarë. Ulja e sipërfaqeve ka ardhur edhe për shkak të mungesës së subvencioneve ndaj kësaj kulture.

LEXONI GJITHASHTU:

• 104 vite nga ngritja e Bibliotekës Kombëtare, ndodhen 1 milion vëllime
• Ndahet nga jeta në moshën 57-vjeçare gazetari dhe analisti i njohur, Aristir Lumezi