Çollaku: Amnistia, pazar për të liruar të dënuarit për korrupsion

Nënkryetari i PD, Kreshnik Çollaku përmes një postimi në Facebook ka reaguar në emër të PD lidhur me përfitimin e nga amnistia e zyrtarëve të dënuar nga GJKKO për korrupsion.

Sipas Çollakut, ndërsa lirohen të korruptuarit, protestuesit demokratë vazhdojnë kalvarin e gjyqeve.

“Është e padrejtë, është amorale, është e pandershme, të përdorësh nevojën  e njerëzve, besimin e publikut dhe sakrificat e demokratëve për të justifikuar e mbuluar pazare banale, lëshuar e përfituar favore të paprincipta. Është hipokrite të bërtasësh për SPAK e Drejtësi të re dhe të shkallmosh e bësh zero rezultatin e punës së tyre. Ndërsa stërkala e çorbës së pazarit derdhej nga goja në sallen e Parlamentit, mbi 100 të dënuar për korrupsion u liruan nga atentati ndaj SPAK që e quajtën “amnisti”.

Ndërsa ata, demokratët e protestave që prej vitesh enden dyerve të gjykatave, ata në emër të të cilëve u gatua gjithë ky pazar, mbetën njëlloj të kërcënuar e të detyruar të vazhdojnë kalavarin e gjyqeve dhe persekutimit.  Asnjë fjalë më shumë se turpi nuk meriton kjo histori. TURP, nëse ju ka mbetur pak ndërgjegje për të kuptuar çfarë është”, shprehet Çollaku.

LEXONI GJITHASHTU:

• Basha: Nga Amnistia u liruan rreth 100 zyrtarë të dënuar për korrupsion
• U arrestua disa orë pasi u lirua nga amnistia, jepet masa e sigurisë për Isufin