Çollaku: Serbia të ekspozohet ashtu siç është, një vend agresor dhe shtojcë e Rusisë

Deputeti i Partisë Demokratike, Kreshnik Çollaku, është shprehur se Shqipëria nuk duhet të bëhet makijazh i Serbisë në Ballkan.

Komentet Çollaku i bëri në një lidhje për Euronews Albania, ku tha se kryeministri Edi Rama duhet të dalë dhe të deklarojë zyrtarisht tërheqjen e Shqipërisë nga ‘Open Balkan’, pasi sipas tij ai është një projekt që i shërben vetëm Serbisë.

Çollaku tha gjithashtu se Serbia duhet të trajtohet ashtu siç është, si një vend agresor dhe një shtojcë e Rusisë.

“Siç e shikoni ka zhvillime të forta. Edhe Maqedonia e Veriut me qeverinë e re do të tërhiqet nga Open Balkan. Dhe Open Balkan përfundoi ashtu siç ne e kishim paralajmëruar që në ditën që e kemi përmendur, një projekt i Serbisë. Sot është vetëm Serbia që e kërkon Open Balkan. Edi Rama para disa muajsh bëri një fjali gjysmë tërheqëse, që e çon në një situatë neutrale.

Turp është që Shqipëria ndenji 10 vite në këtë projekt, por nuk është turp që Rama të dalë e të deklarojë zyrtarisht tërheqjen e Shqipërisë nga Open Balkan. Të paktën si një përfaqësues i opozitës e garantoj se nuk do e kthejmë këtë në retorikë politike. Por është jetike që Serbia të ekspozohet në Ballkan ashtu siç është, një vend agresor që përçon politikat ruse dhe për këtë nuk i duhet dhënë asgjë lloj tolerimi oksigjeni makijazhi.

As me Open Balkan… Shqipëria duhet quajtur me emër, si një shtojcë, si një proksi e Rusisë. Të gjitha vendet e Ballkanit nëse ia vendosin këtë situatë në ball Serbisë, çdo situatë në Ballkan do të jetë më e lehtë, Kosova do të çlirohet më lehtë dhe paqja në rajon do jetë më e garantuar. Tirana nuk mund të jetë më laborator makijazhi i Serbisë”, tha Çollaku.

LEXONI GJITHASHTU:

• Analisti: Do miratohet rezoluta që politika e Serbisë të shpallet genocidiale
• Varhelyi: Serbia të harmonizojë politikën me BE, anëtarësimi i mundshëm në 5 vite