COVID-19, mjekja Gjoni: Në fazën e mesme nis përdorimi i antibiotikut, pasi virusi ka prekur mushkërinë

Mjekja e Qendrës Shëndetësore nr.10 në Tiranë, Fabjola Gjoni tha për Euronews Albania se të gjithë pacientët që kanë simptoma duhet të kontaktojnë menjëherë me mjekun e familjes.

“Ajo që unë doja të theksoja është që sapo të fillojnë simptomat e para duhet të kontaktosh me mjekun e familjes. Mjeku i familjes është ai që përcakton stadin e sëmundjes dhe është në përditësim të përditshëm me protokollet e miratuara nga Komiteti i Ekspertëve.

Format që ndjek mjeku i familjes janë forma e lehtë dhe forma e mesme”, u shpreh ajo.

Gjoni sqaroi më tej se në fazën e parë të sëmundjes pacienti duhet të përdorë vetëm paracetamol dhe vitaminë. Ndërsa, në fazën e mesme përdoret antibiotiku.

“Sipas protokollit të miratuar nga Komiteti i Ekspertëve mjeku i familjes trajton formën e lehtë dhe të mesme të sëmundjes.

Një formë e lehtë ku shenjat e para mund të jenë dhimbja e kokës, pak temperaturë, dhimbje futi, djegie fyti është paracetamoli dhe përdorimi i vitamino-terapisë. Nëse gjendja vazhdon dhe rëndohet kemi formën e mesme, ku shenjat vazhdojnë dhe situata agravohet dhe temperatura vazhdon më shumë se 5 ditë, kur kemi prekje me grafi të mushkërive mund të përdorimin atibiotik-terapinë.

Ndërsa dy format e tjera ne i rekomandojmë në spital”, tha ajo.

“Ju këshilloj të gjithëve  që mos marrin receta nga interneti, por të lidhen direkt me mjekun. Askush të mos kurohet në shtëpi me oksigjeno-terapi, gjithçka duhet të bëhet në kushte spitalore.  

Tashmë kemi një rritje jashtëzakonisht të madhe të pacientëve të prekur me COVID dhe për gjendjen e familjarëve. Kohët e fundit ka një shtim të pacientëve.

Shpeshherë nuk ndiqen kushtet e izolimit. Ju lutem të gjithëve të ndërgjegjësohemi për situatën ku ndodhemi”, u shpreh ajo më tej.  

Lexoni gjithashtu: 

Ishte infektuar me COVID-19, ndahet nga jeta mjeku Ilirjan Draçi

Spitalet rajonale në Shqipëri përshtaten për të kuruar COVID-19, si funksionojnë në rajon