Ministri Bledi Çuçi vizitë në shtëpinë e 25-vjeçarit të vrarë nga efektivi i ‘Shqiponjave’

Ministri i Brendshëm i sapo emëruar Bledi Çuçi ka shkuar në një vizitë në familjen Rasha në kryeqytet.

Gazetari i Euroneës Albania, Merin Maçi raportoi se vizita e tij zgjati rreth 15 minuta.

Synimi i kësaj vizite ishte ngushëllimi i familjes së viktimës nga Ministri i Brendshëm i vendit i cili e mori këtë post vetëm tre ditë më parë duke zëvendësuar kështu Sandër Lleshaj i cili u dorëhoq nga posti i tij pas ngjarjes tragjike të 8 dhjetorit.

“Krahas ministrit të Brendshëm, për herë të parë, të pranishëm kanë qenë edhe drejtuesit më të lartë të Policisë së Shtetit, mes të cilëve ish-zv drejtori i Përgjithshëm Bert Dervishaj, drejtori i Policisë Kriminale, Tonin Vocaj si dhe drejtori i Shërbimit të Çështjeve të Brendshme, Muhamet Rrumbullaku,” – tha gazetari Maçi.

Pikërisht, Rrumbullaku është ai që po udhëheq dhe hetimet sa i takon vrasjes së 25-vjeçarit Klodian Rasha pasi Policia e Shtetit është përjashtuar nga ky hetim për zbardhjen e gjithë ngjarjes.

Në dalje të vizitës Bledi Çuçi ka refuzuar të japë një deklaratë për mediat.