Dakordësia me opozitën, Çuçi: Rikthyem dialogun, çfarë u vendos për komisionet

Në përfundim të Konferencës së Kryetarëve, kreu i grupit parlamentar socialist Bledi Çuçi, pranoi aritjen e dakordësisë me kreun e grupit parlamentar demokrat Gazment Bardhi, për ngritjen e komisioneve parlamentare.

Çuçi tha se Konferenca e Kryetarëve do të mbahet sërish të mërkurën në orën 13:30, ku do të avancohet me ngritjen e 2 komisioneve parlamentare.

Sipas socialistit, palët kanë rënë dakord për një grup të përbashkët pune i cili do të merret me përcaktimin e objektit të hetimit të komisioneve.

“Pavarësisht nga shkaqet që sollën këtë sjellje të opozitës për 4 muaj është lajm pozitiv që më në fund opozita u ul në Konferencën e Kryetarëve ku ne diskutuam sot dhe u duk se ne rivendosëm dialogun aty ku e kishim lënë në muajin tetor.

Sot vendosëm atë që ne e kemi thënë dhe e prisnim për më shumë se 4 muaj, të rregullojnë objektet për dy komisinet që ata propozuan. Lamë një grup të përbashkët pune për të ngritur objektet e komisioneve hetimore, në përputhje me ndryshimet ligjore që u janë bërë komisioneve. Ishte një frymë e mirë për vijimin e një jete parlamentare normale që të gjithë e kamë kërkuar, që të gjithë qytetarët e duan. Ata zgjodhën të ikin nga jeta parlamentare dhe kuptuan se ai aksion nuk i çon asgjëkundi.

Ndërkohë reforma zgjedhore nuk ka asgjë, ka një komsion që vijon punën. Do shohim produktin e këtij komisioni”, tha Çuçi.

Kujtojmë se dy komisionet hetimore që pritet të ngrihen si pjesë e negociatave mes maxhorancës dhe opozitës, janë kontratat në shëndetësi (sterilizimi) dhe komisioni për të dhënat personale.

LEXONI GJITHASHTU:

• Arrihet dakordësia maxhorancë-opozitë në parim, zbulohen komisionet që do të ngrihen
• Mblidhet Konferenca e Kryetarëve, priten rezultate nga negociatat Bardhi-Çuçi