Dalja e informacioneve për agjentët e SHISH cënon sigurinë kombëtare, thotë gazetari

Gazetari Lavdrim Lita deklaroi se dalja e informacioneve për agjentët e SHISH nga hakerat iranianë, cënon sigurinë kombëtare.

Në një intervistë për Euronews Albania, Lita tha se lista e publikuar ishte disi e vjetër, pasi një pjesë e punonjësve që ishin në të, janë larguar nga SHISH.

“Faktikisht, dalja e të dhënave personale të një liste të agjentëve të Shërbimit Informativ Shtetëror, është serioze, e cënon sigurinë kombëtare. Pavarësisht se një pjesë e listës së drejtuesve doli në vitin 2014, për qëllime politike.

Kemi pasur një rrjedhje edhe më përpara. Kanë dalë tani ish-punonjës. Një pjesë e madhe janë larguar drejt vendeve të ndryshme të Evropës dhe SHBA-së, nuk janë më në detyrë. Është një listë disi e vjetër”, theksoi ai.

Hakerat kanë publikuar videot e përgjimeve të Shërbimit Informativ Shqiptar, SHISH.

Një nga videot e publikuara nga “Homeland Justice” tregon përgjime në një nga ambasadat e huaja në Tiranë.

Gazetari i Euronews Albania, Eni Ferhati raportoi se 2 videot e publikuara të hënën pretendohet se janë përgjime të dy ambasadave të huaja në Tiranë, njëra nga të cilat duket si ambasada e Kinës, por kjo mbetet për t’u verifikuar.

Në mesazhin e hakerave në kanalin e tyre Telegram shkruhet ‘Prisni për një bombë’, duke supozuar se kanë materiale të tjera më të rëndësishme.

LEXONI GJITHASHTU

• Hakerat publikojnë videot e përgjimeve të SHISH
• Hakerat shënjestrojnë SHISH, zbulohen emrat dhe pozicionet e 400 punonjësve
• Hakerat publikojnë emrat e drejtuesve dhe shefave të sektorëve në SHISH