Deputeti i PDK: Aleksandër Vulin ishte në Kosovë gjatë sulmit në Banjskë

Aleksandër Vulin dyshohet të ketë qëndruar në veriun e Kosovës, ditën kur ndodhi sulmi terrorist në Banjskë të Zveçanit. Asokohe, Vulin mbante pozitën e shefit të shërbimit sekret serb, pavarësisht se ishte i sanksionuar nga Shtetet e Bashkuara të Amerikës.

Këtë pretendim të qëndrimit të tij në Kosovë ditën e sulmit, e ka bërë deputeti Xhavit Haliti. Por rreth kësaj çështjeje nuk janë deklaruar institucionet e Kosovës.

“Vulin, shefi i shërbimeve të fshehta ishte në veriun e Mitrovicës dhe askush nuk e tha që Vulini ishte, mirëpo diplomacia funksionon pak më ndryshe se që ne mendojmë dhe ai u detyru që të jap dorëheqje në Serbi”, tha deputeti i PDK-së, Xhavit Haliti.

Ai u shpreh se në dijeni të këtij fakti kanë qenë dhe ndërkombëtarët.

“Ndërkombëtarët e dijnë që zotëri Vulin ka qenë në Kosovë në atë periudhë. Tash në cilën ditë, në cilën orë unë nuk e di. Nuk kam informata. Unë e di që ka qenë dhe kanë informata institucionet ndërkombëtare 100%”, tha Haliti.

Aleksandar Vulin mbajti pozitën e shefit të shërbimit sekret të Serbisë edhe pasi Shtetet e Bashkuara të Amerikës e futën në listën e zezë.

Dorëheqjen Vulin e dha pas sulmit terrorist në Banjskë të Zveçanit.

Nëse vërtetohet prezenca e Vulinit në Kosovë, njohësi i çështjeve të sigurisë, Fadil Kajtazi thotë se gjërat do të duhej të ndryshonin.

“Rrethanat do të duhej të ndryshonin për arsye se është një agresion i hapur ndaj një shteti, pavarësisht se Serbia nuk e ka njohur… Se sa do t’i ndryshonte rrethanat ky fakt, varet edhe nga një faktor tjetër, varet nga potenca që ka Kosova në marrëdhëniet ndërkombëtare, e që fatkeqësisht lënë shumë për të dëshiruar për aryse se politika jonë e jashtme është e mekur qe disa vite”, tha Fadil Kajtazi, ekspert i sigurisë.

LEXONI GJITHASHTU:

• Serbia lejon targat e Republikës së Kosovës
• Kurti: Radojiçiç me ushtrinë serbe po përgatitet për sulme të reja në Kosovë