Deputeti që shpëtoi Zaevin: Nuk jam marrë peng, e bëra për negociatat me BE

Deputeti i Lëvizjes Besa, Kastriot Rexhepi, mungesa e të cilit bëri të dështonte votëbesimi i Qeverisë të Maqedonisë së Veriut javën e kaluar, shpjegoi sot arsyet e tij për ndryshimin e mendimit në momentin e fundit. Ai deklaroi se për shkak të bindjeve të tij ideologjike, vendosi që të mos lejojë rrëzimin e kësaj qeverie.

“Me vullnetin tim dhe vendosmëri u strehova në ditën e votimit për mosbesimin e Qeverisë, me qëllim që të mos lejoj që për shkak të valës së rezultateve të zgjedhjeve lokale, vendi të na shkojë në drejtim që është në kundërshtim me bindjet e mia ideologjike dhe në kundërshtim me synimin strategjik që na e kanë dhënë qytetarët”, tha deputeti i Lëvizjes Besa.

Deputeti Rexhepi përgënjeshtroi pretendimet e kryetarit të partisë së tij, Bilall Kasami se ai mund të ishte marrë peng ose detyruar me forcë që të ndryshonte mendje.

“U strehova që të mbroj veten dhe familjen, duke e ditur se do të ishte presioni ndaj meje nëse do të isha fizikisht në sallë. Rezultati në fund do të ishte i njëjtë, por unë do të isha i ekspozuar në sulme, së paku verbale. Janë joserioze dhe të turpshme gënjeshtrat se dikush më ka rrëmbyer, mbajtur me forcë apo më ka kërcënuar me materiale komprometuese”, tha Rexhepi.

I pyetur se pse firmosi për rrëzimin e Qeverisë dhe më pas ndryshoi mendim, Kastriot Rexhepi tha se vendimtar për të ka qenë njoftimi i kryeministrit Zaev se do ta shtyjë dorëheqjen e paralajmëruar, si dhe lajmet se vendi mund të marrë dritë jeshile për hapjen e bisedimeve me BE-në në dhjetor.

LEXONI GJITHASHTU:

• Shfaqet deputeti ‘i zhdukur’ i Lëvizjes Besa: Jam në vend të sigurt dhe në anën e duhur
• ‘Besa’ tërhiqet nga qeverisja, dorëhiqet ministri i Bujqësisë dhe dy zv.ministra