Deputetja e PD-së zbulon datën e gjyqit për vendosjen e traut në Divjakë

Deputetja e Partisë Demokratike, Ilda Dhori deklaroi se të hënë do të zhvillohet seanca e parë e gjyqit për vendosjen e traut në Parkun e Divjakës, pas padisë së bërë prej saj.

Në emisionin “RinON”, Dhori u shpreh se nëse nuk pezullohet vendosja e traut, do të vijojnë protestat.

“Unë mendoj që nuk do të ketë tentativa të tjera për rivendosjen e atij bllokimi, që është një bllokim në një rrugë nacionale të Shqipërisë. E kanë depozituar një javë më parë padinë time dhe ditën e hënë ne kemi seancën e parë të gjyqit, pranë Gjykatës Administrative të Shkallës së Parë, Tiranë.

Besoj që SPAK, gjykata do duhet të pezullojë vendosjen e traut. Nëse nuk ndodh do duhet që të mos ta lejojmë ne fizikisht me praninë tonë aty”, theksoi ajo.

Banorët e Divjakës protestuan disa javë më parë, pasi kundërshtuan vendosjen e traut në park duke detyruar çdo vizitor që të paguajë një tarifë të caktuar për të hyrë brenda tij.

Sipas vendimit të ministrisë, çdo vizitor detyrohet të paguajë 50 lekë të reja, ndërkohë për automjetet është vendosur një tarifë prej 150 lekësh të reja.

LEXONI GJITHASHTU

• Dhori: Edhe Partia Demokratike ka përgjegjësi për largimin e të rinjve
• Petro Koçi sqaron përplasjen Braçe-Balla: Propozimi i Erionit ishte pozitiv
• Petro Koçi-Akil Krajës: Po vrisni edhe të vdekurit, jo vetëm të gjallët