Dëshmia e re ndryshon rrjedhën e hetimeve për Egli Progën, lihet në burg Shkullaku

Gjykata e Shkallës së Parë Korçë ka vendosur masën e sigurisë “Arrest me burg” për Andi Shkullakun, i cili u arrestua tre ditë më parë me urdhër të prokurorisë së Korçës. Shkullaku akuzohet për moskallëzim krimi, në lidhje me ngjarjen e rëndë të ndodhur më 10 gusht 2024, ku mbeti i vrarë 42-vjeçari Egli Proga.

Arrestimi i Shkullakut erdhi pas administrimit të një dëshire të re nga organi i akuzës, e cila hedh dritë mbi dinamikën e ngjarjes. Sipas kësaj dëshmie, Egli Proga fillimisht është dhunuar brenda lokalit nga shtetasi Leonidha Guçe, dhe më pas është goditur jashtë ambienteve nga Denis Meçe, i cili aktualisht akuzohet për vrasje me dashje.

Shkullaku dyshohet se ka qenë prezent në vendngjarje dhe ka dëshmuar aktet e dhunës, por është larguar pa kallëzuar ngjarjen, duke fshehur të vërtetën për hetuesit.

Dëshmia e re është një zhvillim i rëndësishëm në këtë çështje, pasi ndonëse prokuroria kishte mbyllur hetimet dhe dërguar dosjen për gjykim, faktet e reja mund të çojnë në bashkimin e dy dosjeve dhe rishikimin e akuzave.

Aktualisht, për vrasjen e Egli Progës:

• Denis Meçe akuzohet për vrasje me dashje
• Leonidha Guçe, Voltan Shkullaku dhe Arjan Manellari akuzohen për veprime që pengojnë zbulimin e së vërtetës
• Andi Shkullaku për moskallëzim krimi

LEXONI GJITHASHTU:

• Vrasja e Egli Progës, Apeli rrëzon kërkesën e autorit për ndryshim mase
• Progani: Ata që kanë fuqinë për të tjetërsuar dosjet janë njerëz të pushtetshëm