Dështon konstituimi i Kuvendit, Lista Serbe nuk ndryshon kandidatin për nënkryetar

Konstituimi i Kuvendit të Kosovës ka dështuar sërish, për shkak të pamundësisë për të zgjedhur nënkryetarin nga radhët e komunitetit serb, siç parashihet me Kushtetutë dhe Rregulloren e Punës së Kuvendit.

Lista Serbe ka propozuar për herë të tretë Sllavko Simiqin për këtë post, por kandidatura e tij ka marrë vetëm 10 vota, 9 nga deputetët e Listës Serbe dhe një nga Adem Hoxha i komunitetit goran, duke dështuar kështu të zgjidhet.

Për shkak të mungesës së konsensusit dhe pas përsëritjes së votimeve pa sukses, kryetari i Kuvendit, Dimal Basha, vendosi që nënkryetari të zgjidhet përmes shortit, siç e lejon procedura.

Nga shorti u përzgjodh Nenad Rashiq, kryetar i Partisë së Pavarur Liberale, por as ai nuk arriti të marrë mbështetjen e nevojshme në Kuvend.

Rashiq mori 55 vota për, një kundër dhe 17 abstenime, ndërsa deputetët e Lidhjes Demokratike të Kosovës nuk morën pjesë në votim.

Pas dështimit për të zgjedhur përfaqësuesin serb në kryesinë e Kuvendit, seanca konstituive u ndërpre dhe do të vazhdojë të enjten, më 28 gusht, në orën 11:00.

Në seancën e ditës së martë, Kuvendi ka arritur të zgjedhë Dimal Bashën për kryetar me 73 vota, si dhe nënkryetarët nga partitë shqiptare dhe komunitetet jo-serbe.

LEXONI GJITHASHTU:

• Dimal Basha në krye të Kuvendit të Kosovës, Abdixhiku: Një fitore e injorancës
• Legjislatura e 11-të e Kuvendit, shtohen 4 komisione parlamentare