Destinacion viziton Tropojën e Vjetër, në stinën e artë të  vjeshtës

Tropoja e Vjetër, një vend i strukur mes alpeve hijerënda, nga ku kanë dalë shumë trima e njerëz bujarë. Pasazhi i këtij vendi është unik, me një natyrë të bukur.

Për të shkuar në Tropojë të vjetër ka dy rrugë, një nga Gjakova dhe një nga Hasi, për të dalë në luginën ku shtrihet Bajram Curri, qyteti i ri, që i mori famën Tropojës së vjetër në vitet ’50.

Në vjeshtë, ngjyrat e natyrës përkojnë me ato të gështenjës, një frut karakteristik në ato vise. Gështenja e Tropojës është e njohur dhe e shijshme, ndaj eksportohet edhe në vende të tjera, si për shembull në Hungari. Ndërsa në Shqipëri, më shumë kërkesë ka nga Tirana.

Shtëpitë e tropojanëve janë kryesisht të rindërtuara, por ka ende kulla prej guri.

Një veçanti e Tropojës së vjetër është gryka e lumit të Tropojës, që lidhet me bjeshkët piktoreske. Këto bjeshkë ia vlen të vizitohen në pranverë, verë dhe në vjeshtë pasi në dimër për shkak të dëborës nuk është kollaj i aksesueshëm. Në bjeshkët e Tropojës së Vjetër ka plot bujtina që presin vizitorë.

Tropoja shtrihet në verilindje të vendit dhe përbëhet nga 19 fshatra.