Dhunohet aktivisti në Kosovë, arrestohen 2 persona. LDK akuzon Vetëvendosjen

Të paktën dy persona janë arrestuar të dielën në Pozheran të Vitisë, nën dyshimin se e kanë sulmuar një qytetar. Ngjarja ka ndodhur pranë qendrës së votimit në shkollën “Kongresi i Manastirit”.  Policia ka thënë se sulmi fizik nuk lidhet me zgjedhjet, pasi rasti ka ndodhur jashtë perimetrit të qendrës së votimit.

Ndërkohë në një reagim në Facebook, Dega e LDK në Viti akuzon aktivistët e Vetëvendosjes për sulmin.

Reagimi:

“Dega e LDK-së në Viti dënon ashpër sulmin ndaj këshilltarit komunal Ilir Zuka

Dega e Lidhjes Demokratike të Kosovës në Viti dënon ashpër sulmin fizik ndaj këshilltarit komunal, z. Ilir Zuka, nga aktivistët e Lëvizjes Vetëvendosje në Pozheran. Ky akt i shëmtuar dhe i papranueshëm është sulm ndaj vlerave demokratike dhe lirisë së shprehjes.

I bëjmë thirrje organeve të rendit që të ndërmarrin menjëherë masa dhe të vënë para drejtësisë autorët e këtij akti të shëmtuar. Dhuna nuk ka vend në shoqërinë tonë dhe as në jetën publike.

LDK në Viti qëndron fuqishëm pranë z. Zuka dhe të gjithë atyre që angazhohen për një politikë demokratike, pa frikë e kërcënime”.

LEXONI GJITHASHTU:

• Lëvizja Vetëvendosje thirrje qytetarëve: Vota, fuqia juaj për forcimin e shtetit
• Kosovë| DnV raporton për disa probleme gjatë procesit të votimit