Diarre, të vjella dhe dehidratim, ekspertët: Si ndikon salmonela në trupin e njeriut

Salmonela është një bakter që mund të shkaktojë infeksione të ndryshme në trup, të cilat, nëse nuk marrin trajtimin e duhur, mund të kenë pasoja serioze për shëndetin.

Në Shqipëri janë identifikuar 2.6 tonë mish pule të kontaminuara me salmonelë që janë konsumuar nga qytetarët, ndërsa ekspertët bëjnë thirrje për kujdes të shtuar në gatimin e produkteve të mishit.

Salmonela mund të shkaktojë diarre, të vjella, temperaturë dhe një sërë problemesh të tjera, nëse i prekuri nuk merr trajtim mjekësor.

“Një pjesë e rasteve mund të përfshijnë simptoma të tilla si gjak në feçe, temperaturë, dhimbje barku, diarre, të vjella dhe deri në dehidrim. Kur nuk kemi temperaturë, simptomat mund të korrigjohen duke pirë lëngje. Nëse gjendja vazhdon, fëmijët dhe të rriturit duhet të shkojnë te mjeku i familjes për një vizitë më të detajuar. Problemet e shkaktuara nga salmonela zakonisht shfaqen brenda 6-72 orëve pas konsumimit të ushqimeve të kontaminuara. Nëse simptomat përkeqësohen ose nuk kalojnë brenda disa ditësh, është e rëndësishme të kërkoni ndihmë mjekësore, sidomos në rastet e dehidratimit të rëndë, gjakderdhjes në feçe ose temperaturës së lartë që zgjat shumë. Për të zbuluar nëse jeni helmuar me salmonelë, mjekët zakonisht kryejnë një analizë koprokulture”, thotë nutricionistja Albana Daka.

Sipas ekspertëve, ata që janë më të rrezikuarit janë: mosha e tretë, individët me sistem të dobët imunitar.

“Fëmijët janë më të predispozuar për të zhvilluar infeksione gastrointestinale bakteriale. Nëse kemi një sistem të fortë imunitar, simptomat mund të jenë më të lehta dhe të minimizohen. Megjithatë, në disa raste, infeksioni mund të zgjasë disa ditë”, thotë nutricionistja Albana Daka.

Ekspertët bëjnë apel për kujdes të shtuar në gatimin e produkteve të mishit, në temperatura të mjaftueshme për të eliminuar bakteret.

LEXONI GJITHASHTU:

• Kosova nis kontrollet për mishin e pulës me salmonelë, pas gjetjeve në Shqipëri
• “S’bëhet politikë me ushqimin”, Denaj për filetot me salmonelë: Kemi reaguar, por…