Dita e 19-të! Tensione mes protestuesve dhe deputetit Bido, Euronews Albania ndjek nga afër përplasjet

Deputeti i PS-së në zonën e Vlorës, Ardit Bido u gjend mes turmes së protestuesve të cilët u mblodhën këtë të enjte në protestë para Parlamentit. Mes turmës, gazetarja e Euronews Albania Eksiola Shehu i drejtoi disa pyetje Bidos ndër të cilat sesi ndihej teksa qytetarët e thërrasin hajdut.

Bido u shpreh se nuk e emocionojnë turmat dhe se po bëjnë egërsi publike me zhurmë. Ai tha se nga mandati i tij heq dorë vetëm nëse ai kërkojnë votuesit e tij. Gjatë përgjigjes së tij, protestuesit u konfrontuan me të dhe i kërkuan të largohej.

“Kjo është thjeshtë një turmë. E pyeta drejtpërdrejtë dhe më tha kam punuar që 14 vjeç. Sikurse edhe unë. Mua nuk më emocionojnë aspak turmat. Kur të ma kërkojë qarku im dhe votuesit e mij, ama që po bëhet një egërsi publike me zhurmë.

Nuk po nxitoj, ky vend ka nevojë që ne të marrim realisht dhe ti diskutojmë çështjet”, tha ai teksa më pas fjala e tij u ndërpre pasi protestuesit i kërkuan të largohej teksa e bënin thirrje: O hajdut.

Pati protestues të cilët tentuan të afroheshin pranë deputetit. Kjo solli një ndërhyrje nga policia e cila largoi Bidon nga turma pak metra më tutje për sigurinë e tij dhe qetësimin e tensioneve.

Ndryshimi i intenerarit të protestuesve duke marshuar drejt Parlamentit i kapi të papërgatitur deputetët të cilët u pikasën duke u larguar nga ambientet e Kuvendit. Disa deputetë socialistë u përballën me turmën teksa ndaj tyre pati thirrje dhe fishkëllima.

Menjëherë pas grumbullimit të protestuesve para Kuvendit, eskorta e kryeministrit Edi Rama është parë teksa largohet pak para se pjesa tjetër e qytetarëve të bashkohej në protestë para Parlamentit.

Rama u bashkua pasdite në seancën plenare ku qëndroi për disa çaste gjatë votimit të amnistisë penale dhe më pas u largua përshkak të protestave. Pak minuta pasi u pa eskorta e Ramës, kaloi edhe eskorta e kryeparlamentarit Niko Peleshi.

Tensione janë regjistruar para ambienteve të Parlamentit. Protestues të shumtë shihen teksa kanë rrethuar deputetin e PS-së në zonën e Vlorës, Ardit Bido duke i bërë thirrje: O hajdut!

Bido është ‘konfrontuar’ me ta duke i pyetur se çfarë u ka vjedhur. Situata më pas u tensionua pasi shume persona u afruan pranë tij duke sjellë ndërhyrjen e policisë për largimin e tij nga turma.

Një protestues gjithashtu u neutraliza nga policia pasi tentoi të shkonte pas efektivëve të cilët po shoqëronin Bidon.

Protestuesit këtë të enjte kanë vendosur të ndryshojnë intenerarin e zakonshëm të protestës duke marshuar drejt Parlamentit. Qytetarët të cilët ishin mbledhur para Kryeministrisë, janë nisur drejt Parlamentit për t’iu bashkuar pjesës tjetër të protestuesve që momentalisht ndodhen para Kuvendit.

Protestuesit kanë bërë thirrje që të bllokohen hyrjet e Parlamentit. Pas mbledhjes para Parlamentit të protestuesve, kryeministri Edi Rama i cili ishte i pranishëm në seancën plenare është larguar nga ambientet e Kuvendit.

Deputetë të shumtë socialistë gjithashtu janë parë në rrugë teksa largohen ndërsa protestuesit kanë vijuar me protestën e tyre.

Qytetarët edhe këtë të enjte kanë vijuar protestën e tyre ndërsa regjistrohet dita e 19-të. Ndryshe nga ditët e tjera, ata nuk kanë marshuar drejt Kryeministrisë por kanë ndryshuar intinerar teksa po marshojnë drejt Kuvendit ku po mbahet edhe seanca plenare.

Pak minuta më parë në seancën plenare u bashkua edhe kryeministri Edi Rama. Protestuesit shihen me flamuj dhe pankarta në duar teksa bëjnë thirrje për dorëheqjen e Ramës.