Dita e Kulturës Arbëreshe, mbahen aktivitete dhe koncert në Gjirokastër

Në Ditët e Kulturës Arbëreshe në qytetin e Gjirokastrës është zhvilluar një aktivitet i veçantë, i cili ka pasur në qendër promovimin e traditave dhe kulturës arbëreshe të trashëguara në breza.

Në qytetin e gurtë erdhi një grup përfaqësuesish të Bashkisë të San Marzanos, një prej komuniteteve më të mëdha të arbëreshëve në Itali.

“Për mua është hera e parë në Shqipëri dhe këtu në Gjirokastër  dhe mund të them që mikpritja ishte e një niveli të tillë që nuk e prisnim , me të vërtetë shumë e bukur. Është mjaft e mirë ideja që diskutuam për binjakëzimin  mes bashkive të Gjirokastrës dhe San Marzanos, e cila është një bashki me komunitetin arbëresh ndër më të mëdhenjtë në Itali,” – u shpreh Françesko Leo, kryetar i bashkisë San Marzano.

Pjesë e organizimeve ishte edhe një koncert nga artistët popullorë arbëreshë që performuan elementët folklorikë dhe tradicionale të zonës së San Marzanos, dhe shfaqja u ndoq masivisht nga publiku.

“Në këto ditë feste, në këto ditë të shënuara për shqiptarët dhe patjetër edhe për Gjirokastrën dhe Bashkinë e Gjirokastrës ne kemi pasur kënaqësinë dhe nderin  të kemi kryetarin e Bashkisë të San Marcanos,  një mik, një kryetar bashkie ndryshe nga të tjerët në fakt që ka një afinitet, ka një lidhje dhe një dashuri tjetër  edhe me Shqipërinë dhe këtej e tutje me Gjirokastrën , kemi diskutuar  dhe shumë shpejt do të kemi edhe një binjakëzim  midis dy qyteteve për të vazhduar bashkëpunimin  jo vetëm kulturor, artistik,” – u shpreh kryetari bashkisë Gjirokastër, Flamur Golemi.

Përgjatë muajit nëntor në Gjirokastër janë zhvilluar një sërë aktivitetesh kulturore dhe artistike, të cilat kanë pasur në qendër kontributin e patrioteve për Shpalljen e Pavarësisë dhe rezistencën antifashiste gjatë Luftës së Dytë Botërore.

LEXONI GJITHASHTU:

• Kapet duke vjedhur një makinë, arrestohet 27-vjeçari në Gjirokastër
• 28 Nëntori, përgatitet muralja 70 metra me portretet e 17 patriotëve në Gjirokastër