Dita e Verës në Elbasan: Mijëra vizitorë shijojnë atmosferën magjike

Si çdo vit tjetër, Elbasani është mbipopulluar për Ditën e Verës, një festë që ky qytet e respekton si një traditë shekullore. Mijëra qytetarë nga e gjithë Shqipëria kanë mbushur Elbasanin dhe kanë marrë pjesë në aktivitete të ndryshme të organizuara për këtë ditë.

Festimet kanë filluar mbrëmjen e 13 marsit dhe kanë vazhduar këtë të premte me parada, lojëra, muzikë dhe një sërë aktivitetesh të tjera. Ata që i janë gëzuar më shumë festës janë fëmijët, të cilët, me veshje dhe maska, janë bërë pjesë e karnavaleve.

Elbasani ka mbajtur “gjallë” këtë festë dhe gjithë ritet e saj për shekuj me radhë, një arsye mjaftueshme që mijëra qytetarë të zgjedhin ta kalojnë këtu Ditën e Verës, duke e kthyer Elbasanin në kryeqytetin e festimeve.

Ballokumja është “mbretëresha” e festës dhe qindra tregtarë kanë mbushur plot dyqanet dhe rrugët me këtë produkt tradicional të Ditës së Verës.

Ndërkohë, panairet, ekspozitat dhe çdo aktivitet, siç ndodh çdo vit, janë vizituar nga politikanët, të cilët kanë ndarë mendime të ndryshme për ecurinë e ekonomisë vendase, etj.

LEXONI GJITHASHTU:

• Atmosferë me balona dhe performanca muzikore, si u festua Dita e Verës në Tiranë
• Berisha në Elbasan: Dita e Verës frymëzon shpresë, do të rrisim pagat dhe pensionet