Dokumentari ‘Kosova’, barishte të reja, ‘shpirt i vjetër’ prezantohet në Berlin

Mbrëmjen e djeshme, në Ambasadën e Kosovës në Berlin, u shënua premiera e dokumentarit të ri të realizuar për ARTE TV, “Kosovo – neue Kräuter, alter Geist” (“Kosova – barishte të reja, shpirt i vjetër”), që sjell në fokus traditën shekullore të prodhimit të rakisë në Kosovë.

Ngjarja u zhvillua në prani të ambasadorit të Kosovës në Gjermani, Faruk Ajeti, ish-ambasadorit gjerman në Kosovë, Jörn Rohde, regjisores Michaela Kirst, bashkëautorit Kosovë Gjoci, si dhe njërit prej protagonistëve kryesorë të filmit, Ali Alijajt. Dokumentari u mirëprit nga një numër i madh të ftuarish.

Pas shfaqjes, regjisorja Michaela Kirst, bashkëautori Kosovë Gjoci dhe protagonisti Ali Alijajt zhvilluan një diskutim me publikun, duke ndarë procesin e realizimit të filmit dhe duke iu përgjigjur pyetjeve të të pranishmëve.

Dokumentari eksploron traditën e vjetër të prodhimit të rakisë në Kosovë dhe, përmes rrëfimeve të Ali Alijajt dhe Brikena Gashit, paraqet histori suksesi dhe inspirimi për të rinjtë e vendit, sidomos për vajzat dhe për diasporën kosovare. Filmi sjell pamje të veçanta nga natyra dhe jeta rurale e Kosovës, duke theksuar njëkohësisht mundësitë që vendi ofron për investime dhe rikthim në atdhe.

Premiera televizive e dokumentarit “Kosovo – neue Kräuter, alter Geist” do të transmetohet në ARTE më 14 dhjetor, në orën 19:30.