Dosja e AKSHI-t, Berisha: Të dhënat e sigurisë kombëtare dhe NATO-s përfunduan te bandat

Kryetari i Partisë Demokratike, Sali Berisha, mbajti konferencën e radhës për shtyp këtë të hënë, ku ndër të tjera komentoi hetimin e SPAK-ut për AKSHI-n.

Berisha deklaroi për mediat se në dosjen e AKSHI-t janë përfshirë vjedhje masive dhe manipulime, duke përfshirë edhe të dhënat e sigurisë kombëtare dhe ato që lidhen me NATO-n, të cilat kanë përfunduar në duar të paautorizuara, duke rrezikuar sigurinë e vendit.

“Në dosjen e AKSHI-t janë veprat më të shëmtuara në historinë e kombit: vjedhja e plotë dhe totale e të gjitha të dhënave të sigurisë kombëtare dhe atyre që vijnë nga Aleanca e Atlantikut të Veriut në Shqipëri. Kalimi i këtyre të dhënave në duart e bandave dhe armiqve të betuar të kombit shqiptar dhe NATO-s është i papranueshëm. Dosja e AKSHI-t nuk është vetëm për vjedhjet e qindra milionë eurove, por edhe për tre pengmarrje: Gerond Meçe më 12 gusht, Daniel Shima një javë më vonë dhe një tjetër biznesmen i ri, i marrë peng për shkak të lojërave të fatit,” tha Berisha.